गौतम अदानी यांच्या नेतृत्वातील अदानी ग्रुप वेगाने आपल्या व्यवसायाचा विस्तार करत होते. अदानी समूह एकामागून एक मोठे व्यवहार करत होता. समूहाच्या वाढत्या व्यवसायाचा परिणाम शेअर बाजारात दिसून आला आणि समूहातील कंपन्यांचे शेअर्स झपाट्याने वाढले. अदानी समूह मार्केट कॅपनुसार भारतातील सर्वात मोठे उद्योगपती बनले होते. इतकंच नाही तर गौतम अदानी यांनी जगातील श्रीमंतांच्या यादीत दुसऱ्या क्रमांकावर झेप घेतली होती. अदानी समूहाकडे रोख रकमेची कमतरता नसल्याचा दावा केला जात होता. पण हिंडेनबर्ग रिसर्च, अमेरिकन शॉर्ट सेलर कंपनीच्या एका अहवालाने संपूर्ण गणित बिघडवले.
अदानी समूहाचे मार्केट कॅपमध्ये १०० अब्ज डॉलरपेक्षा घट झाली असून अदानी श्रीमंतांच्या यादीत अदानी २४व्या क्रमांकावर घसरले. दरम्यान, आता अदानी पुन्हा एकदा गुंतवणूकदारांचा विश्वास जिंकण्यासाठी प्रयत्नशील आहेत. यासाठी आपल्याकडे पैशांची कमतरता नसल्याचे या गटाचे म्हणणे आहे. या कालावधीत अदानी समूहाने डीबी पॉवर खरेदीची योजना सोडून दिल्याचे वृत्त समोर आले आहे. अशा स्थितीत आता प्रश्न असा आहे की अदानी समूहाकडे पैशांची कमतरता नाही, तर मग त्यांनी करार मध्येच का सोडला?
अदानी ग्रुपने गेल्या वर्षी १८ ऑगस्ट रोजी डीबी पॉवर ७ हजार ०१७ कोटींमध्ये खरेदीचा करार केला होता. वीज क्षेत्रातील हा अदानी समूहाचा दुसरा सर्वात मोठा विलीनीकरण आणि अधिग्रहण करार होता. आधीच्या करारानुकसार ३१ ऑक्टोबर २०२२ पर्यंत अधिग्रहण पूर्ण व्हायचे होते. तेव्हा अदानी समूहाने भांडवली खर्चासाठी पुरेशी रोकड आहे आणि हा करार वेळेत पूर्ण होईल, असा दावा केला होता. मात्र त्यांनी अनेक वेळा मुदत वाढवली. त्याची अंतिम शेवटची तारीख १५ फेब्रुवारी होती पण अदानी समूह वेळेत करार पूर्ण करू शकला नाही.
गेल्या काही काळापासून अदानी ग्रुप आक्रमकपणे अनेक क्षेत्रासह जगभरात व्यवसायाचा विस्तार करत होता पण २४ जानेवारी रोजी आलेल्या हिंडेनबर्ग रिसर्चच्या अहवालाने त्याला ब्रेक लावल्यास दिसत आहे. बाजारातील आपल्या गुंतवणूकदारांचा विश्वास परत मिळवण्यासाठी समूह आपली आर्थिक स्थिती सुधारण्यावर भर देत आहे. यासाठी अदानी समूह आपले कर्ज कमी करत असून तारण ठेवलेल्या शेअर्सची पूर्तता करत आहे आणि रोकड वाढवत आहे. डीबी पॉवर डीलमधून बाहेर पडणे देखील या धोरणाचा एक भाग आहे.
अदानी पॉवरची एकूण स्थापित क्षमता १३.६ गिगावॅट आहे. कंपनीचे सात राज्यांत सात थर्मल प्लांट, तसेच ४० मेगावॅटचे सोलर प्लांट आहे. गेल्या वर्षी ३० सप्टेंबर २०२२ च्या आकडेवारीनुसार कंपनी एकूण ३६ हजार ०३१ कोटी रुपयांच्या कर्जात बुडाल्याचे दिसत आहे.
