वैराग – कुसळंब येथे क्षुल्लक कारणावरून एका व्यक्तीवर गोळीबार करून जीवे मारण्याचा प्रयत्न करणाऱ्या आणि परिसरात दहशत माजवणाऱ्या सराईत गुन्हेगारांच्या टोळीला बार्शी तालुका पोलिसांनी अवघ्या ५ तासांत सिनेमॅटिक स्टाईलने पाठलाग करून बेड्या ठोकल्या आहेत. या कारवाईत पोलिसांनी आरोपींकडून एक देशी बनावटीचे पिस्तूल, जिवंत काडतूस, धारदार शस्त्रे आणि गुन्ह्यात वापरलेली महागडी कार जप्त केली आहे.
नेमकी घटना काय?
मिळालेल्या माहितीनुसार, मौजे कुसळंब येथे तीन इसमांनी किरकोळ कारणावरून एका व्यक्तीला बेदम मारहाण केली. केवळ मारहाणीवर न थांबता, दहशत निर्माण करण्याच्या उद्देशाने त्यांनी पिस्तूलमधून गोळीबार केला आणि संबंधित व्यक्तीला जीवे मारण्याचा प्रयत्न केला. घटनेचे गांभीर्य ओळखून बार्शी तालुका पोलीस ठाण्यात २६ फेब्रुवारी २०२६ रोजी गुन्हा दाखल करण्यात आला होता.
पोलिसांचा थरारक पाठलाग
घटनेनंतर आरोपी फरार झाले होते. पोलीस अधीक्षक श्री. अतुल कुलकर्णी आणि अप्पर पोलीस अधीक्षक श्री. प्रितम यावलकर यांच्या मार्गदर्शनाखाली सहाय्यक पोलीस निरीक्षक दिलीप ढेरे व त्यांच्या पथकाने तांत्रिक विश्लेषण आणि गुप्त बातमीदारांमार्फत आरोपींचा शोध सुरू केला.
तपासादरम्यान ही टोळी करमाळा परिसरात असल्याची माहिती मिळाली. पोलिसांनी तातडीने दोन पथके तैनात करून सापळा रचला. तब्बल ५ तास पाठलाग केल्यानंतर, पोलिसांनी आरोपींना शिताफीने ताब्यात घेतले. २७ फेब्रुवारी रोजी पहाटे ३:२० च्या सुमारास ही अटक करण्यात आली.
अटक केलेले आरोपी:
१. योगेश भास्कर मोरे (वय २९ वर्षे, रा. कुसळंब, ता. बार्शी, सध्या रा. हडपसर, पुणे)
२. राहुल दता गायकवाड (वय २६ वर्षे, रा. कुंभारगाव, ता. करमाळा, सध्या रा. हडपसर, पुणे)
३. रोशन दत्तात्रय पिसाळ (वय ३२ वर्षे, रा. बागलानीनगर, हडपसर, पुणे)
जप्त केलेला मुद्देमाल:
१ देशी बनावटीचे पिस्तूल आणि १ जिवंत काडतूस.
२ लोखंडी रॉड, १ लाकडी दांडका आणि १ कोयता.
गुन्ह्यात वापरलेली ‘ह्युंदाई ऑरा’ (HYUNDAI AURA) कंपनीची चारचाकी कार.
न्यायालयीन कारवाई
सर्व आरोपींना न्यायाधीशांसमोर हजर केले असता, न्यायालयाने त्यांना ०२ मार्च २०२६ पर्यंत पोलीस कोठडी सुनावली आहे. या प्रकरणाचा पुढील तपास सहाय्यक पोलीस निरीक्षक दिलीप ढेरे करत आहेत.
बार्शी पोलिसांनी केलेल्या या वेगवान कारवाईमुळे परिसरात पोलिसांचे कौतुक होत असून, गुन्हेगारांमध्ये धडकी भरली आहे.
