मोदी सरकारच्या तिसऱ्या कार्यकाळात केंद्रीय मंत्रिमंत्र्यांचे खातेवाटप जाहीर करण्यात आले आहे. पंतप्रधान नरेंद्र मोदींच्या तिसऱ्या कार्यकाळासाठी मंत्रिपदांची विभागणी करण्यात आली असून निर्मला सीतारामन यांना पुन्हा एकदा अर्थमंत्रिपदाची जबाबदारी देण्यात आली आहे. मोदी सरकारमध्ये सीतारामन यांची अर्थमंत्री बनण्याची ही दुसरी वेळ असेल. देशाच्या पहिल्या फुल-टाइम अर्थमंत्री बनण्याचा मान सीतारामन यांना मिळाला आहे.
निर्मला सीतारामन यांच्या नावे नवीन विक्रम
मोदी सरकारच्या दुसऱ्या कार्यकाळातही सीतारामन यांनी अर्थमंत्री म्हणून कामकाज सांभाळले. फेब्रुवारी २०२४ मध्ये, लोकसभा निवडणुकीपूर्वी, सलग सहा अर्थसंकल्प (बजेट) सादर करणाऱ्या सीतारामन पहिल्या अर्थमंत्री बनल्या तर माजी पंतप्रधान मोरारजी देसाई यांनी सलग पाच अर्थसंकल्प सादर केलेले. आता जुलैमध्ये सातवा अर्थसंकल्प सादर करून निर्मला आणखी एक पाऊल पुढे जातील. मात्र, मोरारजी देसाई यांचा सर्वाधिक दहा अर्थसंकल्प सादर करण्याचा विक्रम मोडण्यासाठी त्यांना आणखी काही वर्षे वाट पाहावी लागणार आहे.
निर्मला सीतारामन यांना पुन्हा अर्थमंत्रीपद
आपल्या तिसऱ्या कार्यकाळात पंतप्रधान मोदींनी पुन्हा एकदा निर्मला सीतारामन यांच्यावर विश्वास दाखवला. यापूर्वी दोन वेळा केंद्रीय मंत्री राहिलेल्या निर्मला सीतारामन यांनी २०१९ च्या पूर्ण अर्थसंकल्पापासून सुरुवात करून यापूर्वीच सहा अर्थसंकल्प सादर केले आणि या कार्यकाळात त्यांनी सहा अर्थसंकल्प सादर केले ज्यामध्ये पाच पूर्ण तर एक अंतरिम अर्थसंकल्पाचा समावेश होता. त्याचवेळी निर्मला सीतारामन यांनी काही महिने अर्थ राज्यमंत्री म्हणूनही कामकाज सांभाळले होते.
अर्थमंत्री म्हणून केल्या बऱ्याच सुधारणा
निर्मला सीतारामन यांनी २०१९ मध्ये दिवंगत अरुण जेटली यांच्यानंतर अर्थ मंत्रालयाची सूत्रे हाती घेतली. यश अर्थमंत्री म्हणून संपूर्ण कार्यकाळ कार्यभार सांभाळणाऱ्या देशातील पहिल्या महिला ठरल्या. मागील पाच वर्षात अर्थमंत्री म्हणून निर्मला सीतारामन यांनी बऱ्याच प्रमुख सुधारणा केल्या त्यापैकी मुख्य म्हणजे कॉर्पोरेट कर ३० टक्क्यांवरून २२ टक्क्यांपर्यंत कमी केला. याशिवाय करोना काळातील आव्हानातून देशाला बाहेर काढत २० लाख कोटींचे विशेष आर्थिक पॅकेजही जाहीर केले जे देशाच्या जीडीपीच्या १०% होते.
सर्वाधिक वेळा अर्थसंकल्प सादर करणारे अर्थमंत्री कोण
निर्मला सीतारामन यांनी आतापर्यंत एकूण सहा अर्थसंकल्प सादर केले असून सर्वाधिक वेळा बजेट सादर करण्याचा मान माजी अर्थमंत्री मोरारजी देसाई यांना आहे ज्यांनी एकूण १० अर्थसंकल्प सादर केले. त्याचवेळी, पी. चिदंबरम यांनी ९ तर प्रणव मुखर्जी यांनी ८ वेळा बजेट सादर केला आहे. त्यानंतर यशवंत सिंह आणि डीसी देशमुख यांनी एकूण ७ अर्थसंकल्प सादर केले करून मनमोहन सिंग यांनी सहा अर्थसंकल्प सादर केले. तर अर्थसंकल्प सादर करणाऱ्या इंदिरा गांधी या पहिल्या महिला होत्या.
