सोलापूर : शहरात दरवर्षी पावसाळ्यात सखल भागांमध्ये पाणी साचून नागरिकांना होणाऱ्या त्रासावर आता कायमस्वरूपी उपाययोजना होणार आहेत. सोलापूर महानगरपालिकेने शहरातील पावसाळी पाणी साचण्याच्या समस्येवर ठोस तोडगा काढण्यासाठी ७४ नाल्यांचा पर्जन्यजल नियंत्रण व आपत्ती व्यवस्थापन आराखडा तयार केला असून, या आराखड्यास महापालिका आयुक्त डॉ. सचिन ओम्बासे यांनी सक्षम मंजुरी दिली आहे.
सन २०१८, २०२० आणि २०२५ मध्ये शहरातील अनेक भागांमध्ये गंभीर जलसंचय निर्माण झाला होता. पावसाचा योग्य निचरा न होणे, नैसर्गिक प्रवाहात अडथळे व नाल्यांवरील अतिक्रमण ही यामागील प्रमुख कारणे होती. ही परिस्थिती पुन्हा उद्भवू नये, यासाठी महानगरपालिकेने सखोल अभ्यास करून हा व्यापक आराखडा तयार केला आहे. ड्रोन सर्व्हेक्षण, सॅटेलाईट इमेज, टोपोशीट व टोटल स्टेशन सर्व्हेच्या आधारे शहरातील १७८ चौ.कि.मी. क्षेत्रात ७४ नाले निश्चित करण्यात आले असून, त्यांची ६ बेसिनमध्ये विभागणी करण्यात आली आहे. नाल्यांची एकूण लांबी सुमारे ११५.७७ कि.मी. इतकी आहे.
आराखड्यानुसार नाल्यांची सफाई, गाळ काढणे, अतिक्रमणे हटवणे, नाल्यांची रुंदी व खोली वाढवणे, भूमिगत नाले, बॉक्स कल्व्हर्ट व क्रॉस ड्रेनेजची कामे करण्यात येणार आहेत. पहिल्या टप्प्यात ३० नाल्यांवर प्रत्यक्ष काम सुरू करण्यात आले आहे.
महानगरपालिकेच्या अधिकृत संकेतस्थळावर हा संपूर्ण आराखडा नागरिकांसाठी उपलब्ध करून देण्यात आला असून, सोलापूर शहराच्या पावसाळी समस्येवर हे शाश्वत आणि ऐतिहासिक पाऊल ठरणार आहे.
असा आहे आराखडा
एकूण नाले : ७४
बेसिन : ६
नाल्यांची लांबी : ११५.७७ कि.मी.
पहिला टप्पा : ३० नाले
मंजुरी : आपत्ती व्यवस्थापन अधिनियम २००५ अंतर्गत
आपत्ती व्यवस्थापन अधिनियमानुसार मंजुरी
आपत्ती व्यवस्थापन अधिनियम २००५ मधील कलम २६ व कलम ३० अंर्तगत प्राप्त अधिकारास अनुसरून तसेच केंद्रशासनाचे विधी व न्याय मंत्रालय यांचेकडील आपत्ती व्यवस्थापन कायदा २००५ मधील दि. २९ मार्च २०२५ च्या (Amendment) दुरुस्तीमधील कलम ४१A नुसार शहर प्राधिकरण (Urban Authority) स्थापित करून मा. आयुक्त, सोलापूर महानगरपालिका, सोलापूर यांना शहर आपत्ती व्यवस्थापन प्राधिकरणाचे अध्यक्ष म्हणून अधिकार प्राप्त झाले असून, दि. ऑक्टोबर ते डिसेंबर २०२५ दरम्यान झालेल्या आढावा बैठकीत ७४ नाल्यांचा पर्जन्यजल नियंत्रण व आपत्ती व्यवस्थापन आराखडा, तांत्रिक अहवाल तसेच तात्पुरत्या व कायमस्वरूपी उपाययोजनांना सक्षम मंजुरी देण्यात आली आहे.
माहिती वेबसाईटवर उपलब्ध
सोलापूर शहर आपत्ती व्यवस्थापन आराखडा, पर्जन्यजल नियंत्रण आराखडा, नालानिहाय सर्व्हेक्षण अहवाल व समिती बैठकींचे इतिवृत्तांत सोलापूर महानगरपालिकेच्या अधिकृत संकेतस्थळावर उपलब्ध करून देण्यात आले आहेत.https://www.solapurcorporation.gov.in/smc/dmp_plan_details सोलापूर शहरातील पावसाळी पाणी साचण्याच्या समस्येवर शाश्वत व कायमस्वरूपी उपाययोजना राबविण्याच्या दिशेने हे एक महत्त्वपूर्ण पाऊल असल्याचे महानगरपालिकेच्या वतीने स्पष्ट करण्यात आले आहे.
बेसिननिहाय वर्गीकरण याप्रमाणे :
अ. क्र. बेसिन समाविष्ट नाले एकूण लांबी (कि.मी.)
1 बेसिन क्र. १ सुनील नगर ते दहीटणे 10 13.02
2 बेसिन क्र. २ रेल्वे नाला 32 52.27
3 बेसिन क्र. ३ आदिला नदी 05 16.89
4 बेसिन क्र. ४ विजापूर रोड ते सोरेगाव तलाव 04 9.22
5 बेसिन क्र. ५ होटगी रोड ते मजरेवाडी 09 12.54
6 बेसिन क्र. ६ आकाशवाणी केंद्र, नवले नगर ते देसाई सांडपाणी प्रक्रिया केंद्र 14 11.83
एकूण 74 115.77कि.मी.
