पंढरपूर – येथील काण्ववेद पाठशाळेकडून दिला जाणारा ब्रम्हभूषण पुरस्कार येथील रामसखा कृष्णाजी बडवे यांना तर काण्ववेद पुरस्कार वाशिमचे ज्येष्ठ वैदिक, भागवताचार्य पंकजजी देव महाराज यांना मंगळवारी (ता.३) प्रदान करण्यात आले.
काण्ववेद पाठशाळेचे अध्यक्ष ह.भ.प.शंकरमहाराज बडवे यांनी या कार्यक्रमातच पुरस्कार राशी पाच सहस्त्रावरुन अकरा सहस्त्र केल्याची घोषणा केली.
काण्ववेदपाठशाळेचे प्रधानाचार्य वे.शा.सं.शंकरमहाराज गलगलकर यांनी शाळेच्या पंचवीस वर्षांहून अधिक काळांचा व यापूर्वीच्या वैदिक विद्वज्जनांच्या पुरस्कारांचा उहापोह केला. वेदप्रसारकार्य व शिक्षण कार्य पुढे ही चांगलेच चालू राहील असे अभिवचन दिले. शिक्षक शिकवायला तयार आहेत पण विद्यार्थी मिळत नाहीत ही खंतही व्यक्त केली.
याच कार्यक्रमात पंढरपूर नगरपरिषदेचे नवनिर्वाचित युवा नगरसेवक भागवत महाजन बडवे यांचा या निमित्ताने सत्कार करण्यात आला. यावेळी नगरसेवक बडवे यांनी काण्ववेद पाठशाळेस सर्व प्रकारचे सहाय्य करीत राहू असे आश्वासन दिले.
कार्यक्रमाचे सूत्रसंचालन वैभव मुंडेवाडीकर यांनी केले. दोन्ही पुरस्कारार्थींचा अल्पपरिचय हिंदू महासभेचे नेते अभयसिंह कुलकर्णी इचगावकर यांनी करून दिला.
या काण्ववेदपाठशाळेच्या वर्धापन दिनानिमित्त अन्य काही धार्मिक कार्यक्रम भागवत महाजनबडवे आणी अभिराज बडवे यांचेकडून संपन्न झाले. अतिशय पवित्र आणी मंगलमय वातावरणात मंदिर परिसरातील श्री त्र्यंबकेश्वर मंदिरात हा कार्यक्रम संपन्न झाला. या कार्यक्रमास पाठशाळेतील विद्यार्थ्यां समवेतच इतर नागरिक देखील मोठ्या संख्येने उपस्थित होते.
——————–
ब्रम्हभूषण पुरस्कार मिळालेले रामसखा बडवे यांचा परिचय
सावरकरांचे सहकारी, क्रांतिवीर वसंतदादा बडवे व त्यांचे सर्व बंधू राष्ट्रभक्तीने प्रेरित होते. ” हे काय बंधू असतो जरी सात आम्ही, त्वस्थंडिच असते दिधले बळी मी”अशा पध्दतीने हे सातबंधू देशसेवेसाठी क्रांती, सावरकर समादेशाप्रमाणे सैन्यसेवा व हिंदुमहासभा विचारांतून देशसेवा करीत होते. रामसखा यांनी षट्कर्मांचे यथास्थित पालन करून ब्राम्हतेज टिकविले. स्वतः वेदाध्ययन करुन नवीन युवकांना विनाअट निःशुल्क शिकविले. वेदविद्या ही पोटभरणेची विद्या नसून ते कर्तव्य आहे याचे भान राखले. अखिल हिन्दुत्वाच्या भावनेने अनेक बहुजन युवकांना मार्गदर्शन केले. अनेक ब्राह्मण युवकांना वेदाध्ययनाची गोडी लावून संहितेपर्यंत शिकविले. याच विद्यार्थ्यांनी त्यांचा हा बहुमान केला.
——————
काण्ववेद पुरस्कार मिळालेले पंकजजी देव परिचय
या कार्यक्रमातील मुख्य असा, “काण्ववेद पुरस्कार ” विदर्भातील वाशीम नगरीचे, बालाजी मंदिराचे अधिकारी, वैदिक वारकरी विद्वान, भागवताचार्य, पंकजजी देव महाराज यांना देण्यात आला. त्यांनी पंचवीस वर्षांहून अधिकवेळा वारीला आलो, आज पांडुरंग प्रसाद मिळाला तो पांडुरंगचरणी लीन आहे असे भावगर्भ ऊद्गार काढले. त्यांचे मार्गदर्शन व जटा क्रमसहित अल्प वेदपठनाने उपस्थित भारावून गेले व त्यांना काही सेवेसाठी पुन्हा पंढरीला या असे आवाहन केले.
