तभा वृत्तसेवा,
पंढरपूर – आम्हाला नगराध्यक्षपदासाठी एक चिन्ह आणि इतर आमच्या नगरसेवकपदासाठीच्या उमेदवारांना दुसरे चिन्ह देण्याचा घाट येथील निवडणूक निर्णय आधिकाऱ्यांकडून घातला जात असल्याचा आरोप तिर्थक्षेत्र विकास आघाडीकडून नगराध्यक्षपदाची निवडणूक लढविणाऱ्या उमेदवार डाँ.प्रणिता भालके यांनी केला आहे.
भालकें यांनी नुसता आरोप केला नाही तर नगरपालिका कार्यालयातील निवडणूक कक्षात जावुन संबंधित आधिकाऱ्यांना याबाबत जाब देखील विचारला. दरम्यान निवडणूक आयोगाच्या नियमानुसारच आमच्या कडून कामकाज केले जात आहे. त्या मध्ये कोणाताही दुजाभाव केला जात नसल्याचे येथील निवडणूक निर्णय अधिकारी सीमा होळकर यांनी आपली भूमिका मांडताना स्पष्ट केले.
या आरोप, प्रत्यारोपा संदर्भातील सविस्तर माहिती अशी की, पंढरपूर नगरपरिषदेच्या निवडणूकीची रणधुमाळी आता शिगेला पोहचलेली दिसत आहे. सत्ताधारी आणि विरोधी गटाकडून एकमेकांवर आरोप- प्रत्यारोपाच्या फैरी झाडल्या जात आहेत. या मध्येच येथील तिर्थक्षेत्र विकास आघाडीच्या नगराध्यक्षपदाच्या उमेदवार डाँ.प्रणिता भालके यांनी निवडणूक निर्णय आधिकाऱ्यांकडून चिन्हा बाबत दुजाभाव केला जात असल्याचा आरोप करीत येथील नगरपालिका इमारती मधील निवडणूक कार्यालयात मंगळवारी (ता.२५) धाव घेत संबंधितांना जाब विचारला. यावेळी त्यांच्या समवेत त्यांचे पती तथा विठ्ठल सहकारी साखर कारखान्याचे माजी अध्यक्ष भगिरथ भालके तसेच नगरसेवक पदाचे उमेदवार आदित्य फत्तेपूरकर आदींसह तिर्थक्षेत्र विकास आघाडीचे पदाधिकारी आणि कार्यकर्ते उपस्थित होते.
दरम्यान निवडणूक निर्णय आधिकाऱ्यांकडून तिर्थक्षेत्र विकास आघाडीच्या नगराध्यक्षपदासाठीच्या उमेदवाराला आणि अन्य नगरसेवक पदाच्या उमेदवाराला एकच चिन्ह दिलेल जाणार की वेगवेगळी चिन्हे वाटप होणार हे पाहणे आता उत्सुकतेचे आहे. जर वेगवेगळी चिन्हे दिली तर तिर्थक्षेत्र विकास आघाडी आंदोलनाची भूमिका घेणार याकडे पंढरपूरवासियांचे लक्ष लागलेले आहे.
———————-
अधिकाऱ्यांकडून चिन्हा बाबत दुजाभाव होत असल्याचा डाँ.भालके यांनी केला आरोप
येथील निवडणूक निर्णय अधिकारी पहिल्या दिवसांपासून दुजाभाव करीत असल्याचा आरोप डाँ.भालके यांनी केला आहे. निवडणूकीच्या कार्यक्रमा नुसार सर्वांनाच चिन्हाचे वाटप बुधवारी (ता.२६) केले जाणार आहे. मात्र येथील पंढरपूर मंगळवेढा विकास आघाडीकडून चिन्हा वाटपा अगोदरच त्यांचे कपबशी हे चिन्ह प्रचार दरम्यान कसे काय मिरवले जात आहे. नागरिकांना कपबशी चिन्हा समोरील बटण दाबण्याचे आवाहन त्यांच्या उमेदवारांकडून कसे केले जात असल्याचा जाब विचारला. येथील निवडणूक निर्णय अधिकाऱ्यांकडून सत्ताधारी भाजपा आणि त्यांच्यासमवेत निवडणूक लढविणाऱ्या त्यांच्या पंढरपूर मंगळवेढा विकास आघाडीला एक न्याय दिला जातो आहे.
या उलट आपल्या तिर्थक्षेत्र विकास आघाडीला दुसरा न्याय दिला जात असल्याचा आरोप केला. कारण आमची देखील तिर्थक्षेत्र विकास आघाडी ही रजिस्टर्ड आहे. त्यामुळे आमच्या नगराध्यक्षपदाच्या उमेदवारासह नगरसेवक पदाची निवडणूक लढविणाऱ्या सर्व उमेदवारांना एकच चिन्ह मिळाले पाहिजे. मात्र निवडणूक निर्णय आधिकाऱ्यांकडून नगराध्यक्षपदासाठी एक आणि आमच्या सर्व नगरसेवकपदाच्या उमेदवारांना दुसरे चिन्ह देण्याचा घाट घातला जात आहे. या संदर्भात भालके यांच्याकडून आधिकाऱ्यांना जाब विचारण्यात आला. चिन्ह वाटपा अगोदरच सध्या प्रचारा दरम्यान विरोधकांकडून कसा काय चिन्हाचा वापर होत असल्याचे व्हिडिओ देखील दाखविण्याची तयारी यावेळी त्यांनी दर्शविली.
————————
डाँ. भालकेंच्या आरोपांवर अधिकारी सीमा होळकर यांचे स्पष्टीकरण –
आयोगाने निवडणूकीचा जाहीर केलेला जो कार्यक्रम आहे त्या प्रमाणे चिन्ह वाटप उद्या आहे. चिन्ह वाटपा संदर्भात तिर्थक्षेत्र विकास आघाडीच्या लोकांचे काही म्हणणे होते ते मांडण्यासाठी ते इथे आलेले होते. त्यांचे म्हणणे असे होते की आम्हाला सगळ्यांना एक म्हणजे नगराध्यक्षपासून ते सदस्या पर्यंत सगळ्यांना आम्हाला एकच चिन्ह मिळावे अशी त्यांची मागणी होती. ती मागणी मांडण्यासाठी ते सर्वजण इथे आलेले होते. त्या संदर्भात नियम, अटी काय आहेत ते त्यांना सांगण्यात आले आहे. याच्या व्यतरिक्त चिन्हा बाबतचा जो काही निर्णय आहे तो उद्या होणार आहे. दरम्यान राष्ट्रीय पक्षाला चिन्ह दिलेले असते त्यामुळे त्यांचा चिन्हाबाबत काही विषय येत नाही. राज्यपक्षांना चिन्हे दिलेली असतात त्यामुळे त्यांचा देखील विषय येत नाही. मात्र नोंदणीकृत अमान्याताप्राप्त ज्या आघाड्या आहेत किंवा जे पक्ष आहेत त्यांच्या संदर्भात काही नियम आहेत. त्या नियमा प्रमाणे संबंधित आघाडीने उमेदवारी अर्ज दाखल होण्याच्या अगोदर तीन दिवस त्यांना जर काही एखादे चिन्ह हवे असेल तर जिल्हाधिकारी कार्यालयात त्या संदर्भात अर्ज करणे आवश्यक असते. तो अर्ज केल्या नंतर तेथून त्यांच्यासाठी चिन्ह गोठविले जाते किंवा दिले जाते. या प्रमाणे तिर्थक्षेत्र विकास आघाडीने अर्ज केला होता. पण तो वेळेत न केल्यामुळे जिल्हाधिकारी कार्यालयाकडून त्यांना चिन्ह गोठवुन दिले नाही. त्यांचा विषय असा होता की ते चिन्ह त्यांना इथे मिळावे ही मागणी करीत ते इथे आलेले होते.
———————
अखरे एकच चिन्हाचा रात्री उशिरा निर्णय –
दरम्यान दिवसभराच्या धुमचक्री नंतर येथील निवडणूक निर्णय आधिकाऱ्यांनी रात्री उशिरा तिर्थक्षेत्र विकास आघाडीच्या नगराध्यक्ष आणि नगरसवेकपदाच्या सर्व उमेदवारांना एकच रिक्षा देण्यात येईल असे जाहीर केल्याची माहिती तिर्थक्षेत्र विकास आघाडीच्या पदाधिकाऱ्यांकडून देण्यात आली.
—————————–
आमच्या नगराध्यक्षपदासाठी आणि सर्व नगरसेवक उमेदवारांसाठी एकच चिन्ह जर मिळाले नाही तर उद्या पासून आम्ही मतदानाच्या तारखे पर्यंत अर्थात २ डिसेंबर पर्यंत नगरपालिका कार्यलाया मध्ये धरणे आंदोलन किंवा ठिय्या आंदोलन करणार आहोत. आम्ही कोणताही प्रचार करणार नाही आहोत. चिन्हा बाबतचा हा दुजाभाव आम्ही कदापिही सहन करणार नाही.
