सोलापूर – दमानी नगर येथील 1922 साली बांधलेला इंग्रजांनी बांधलेला रेल्वे ब्रिज पहाटेपासून मरीआई चौक ते भैय्या चौक या ठिकाणी पत्रे मारून वाहतुकीसाठी बंद करण्यात आला आहे. 103 वर्ष जुना हा पूल झाल्यामुळे 14 डिसेंबर रोजी हा पूल पाडला जाणार आहे. पर्यायी मार्ग हे अरुंद असल्याने वाहतुकीची समस्या जाणवू लागली आहे. दोन वर्षांपासून हा ब्रिज पडणार हे निश्चित झालेले असताना अवंती नगर ते सीएनएस पर्यंत जाणाऱ्या 54 मीटरच्या कामाकडे दुर्लक्ष केले होते. आता हे काम दिवस रात्र पद्धतीने युद्ध पातळीवर सुरू आहे. ब्रिज आज बंद झाला तरीही चोपन मीटरचे काम अद्याप झालेले नाही. अर्धवट अवस्थेत आहे. मरीआई चौकातून, शेती वस्तीतील अरुंद बोगद्यातून सकाळपासून ये जा करण्यासाठी नागरिकांची मोठी गर्दी दिसून आली. पोलीस प्रशासनाच्या वतीने शहर वाहतूक शाखेचे पोलीस देखील नियुक्त करण्यात आले आहेत.
सोलापूर शहर पोलीस व वाहतूक शाखे कडून शेटेवस्ती येथील रेल्वे भुयारी मार्गात शिस्तबध पद्धतीने रस्त्यावर वाहतूक सुरळीत ठेवण्यात आली. एकाबाजूने वाहतूक सोडत असताना त्याला ओव्हरटेक करून वाहनधारक पुढे आल्यास वाहतूक कोंडी होणार हे गृहीत धरून चांगले नियोजन करण्यात आले आहे.
लोकशाहीर अण्णाभाऊ साठे चौकातील शंभर वर्ष जुनापूल पाडण्याची प्रक्रिया 10 डिसेंबर पासून करण्यात आली. यामुळे मंगळवारी मध्यरात्रीपासून मरीआई चौक ते भैय्या चौक हा मार्ग वर्षभरासाठी बंद करण्यात आला. मरीआई चौक, शेटे नगर, एसटी स्टँड, मरीआई चौक, नागोबा मंदिर, स्टेशन आणि जगताप हॉस्पिटल, नवीन रेल्वे बोगदा, जुना पुणे नाका या तीन पर्यायी मार्गांवर अधिकाऱ्यांसह वाहतूक पोलिसांची नेमणूक करण्यात आली आहे. हे पोलीस सकाळी 7 ते 9 पर्यंत असणार आहेत.
चारचाकी व दुचाकी वाहनांसाठी हे आहेत चार पर्यायी मार्ग
१) मरिआई चौक ते एसटी स्टँड रोड : या रस्त्यावरून ये – जा करणाऱ्या दुचाकी, चारचाकी वाहनांसाठी मरीआई चौक – शेटे नगर रेल्वे बोगदा – खमीतकर अपार्टमेंट, एमएसईबी ऑफिस – निराळे वस्ती – छत्रपती शिवाजी महाराज चौक ते एसटी स्टँड.
२) मरीआई चौक ते रेल्वे स्टेशन रोड : मरीआई चौक – नागोबा मंदिर – रामवाडी पोलीस चौकी – रामवाडी दवाखाना – रामवाडी ग्रीन गोडाऊन – मोदी बोगदा – जांबुमुनी चौक – मोदी चौक – कुमार चौक रेल्वे स्टेशन.
३) मंगळवेढा रोड : मंगळवेढाहून – हैदराबाद – तुळजापूर – विजयपूर – पुण्याकडे जाणाऱ्या वाहनधारकांना व या रोडने मुंबई मंगळवेढ्याकडे जाणाऱ्या वाहनचालकांना नवीन विजापूर रोड ते केगाव बायपासचा वापर करता येईल.
४) देगाव व दमानी नगर : देगाव व दमानी नगर परिसरातील रहिवाशांना सोलापूर शहरात ये – जा करण्यासाठी जगताप हॉस्पिटल – सीएनएस हॉस्पिटल – जानकर नगर – नवीन रेल्वे बोगदा – अभिमानश्री नगर – अरविंदधाम वसाहत – जुना पुना नाका ते इच्छितस्थळी जाता येईल.
