भोकरदन / जालना – भोकरदन शहरात नगरपरिषद सार्वत्रिक निवडणुकीच्या निमित्ताने काँग्रेसचे प्रदेशाध्यक्ष श्री. हर्षवर्धन सपकाळ आले असता त्यांनी राष्ट्रवादी काँग्रेस पार्टी शरदचंद्र पवार पक्षाबाबत चुकीचे वक्तव्य केले होते. याबाबत मा.आ.चंद्रकांत पुंडलिकराव दानवे यांनी पत्रकार परिषद घेऊन खासदार डॉ.कल्याण काळे व जिल्हाध्यक्ष राजाभाऊ देशमुख यांनी सपकाळ यांना चुकीची माहिती दिली असल्याचे सांगितले. तर भाजपासोबत खरी युती कुणाची हे भोकरदनच्या जनतेला माहिती असुन भोकरदन येथील काँग्रेस पक्ष हा कुणाची बी-टीम म्हणुन काम करतो. हे भोकरदन शहरातील सर्व नागरीकांना माहित असुन माजी खासदार रावसाहेब दानवे व आमदार संतोष दानवे यांनी भोकरदन शहरातील अनेक सरकारी जमिनी बळकवण्याचे काम करत असून याबाबत खासदार कल्याण काळे निवडुन आल्यानंतर एक वर्षे झाले तरी देखील एक सुद्धा तक्रार अथवा भ्रष्टाचाराची चौकशी त्यांनी केली नाही. किंवा भोकरदन जाफ्राबाद विधानसभा मतदारसंघातील भाजपाच्या चुकीच्या कामांना कोणताही विरोध केला नाही. त्यामुळे भाजपा सोबत खरी युती कुणाची हे काँग्रेस प्रदेशाध्यक्षांनी खासदार काळे व जिल्हाध्यक्ष राजाभाऊ देशमुख यांना विचारावे असे मा.आ.चंद्रकांत दानवे यांनी बोलतांना सांगितले. भोकरदन नगरपरिषदेवर 2017 पासुन काँग्रेस पक्ष सत्तेत असतांना जिल्हाध्यक्ष राजाभाऊ देशमुख यांनी नगरपरिषदेचा 9 कोटी रूपयाचा निधी त्यांच्या पत्नी मंजुषा देशमुख या नगराध्यक्षा असतांना कुणाच्या सांगण्यावरून किंवा कुणाच्या दडपणाखाली किंवा कोणत्या समजुतदार पणाने सार्वजनिक बांधकाम विभागास हस्तांतरीत केला. व याच निधीचा वापर भाजपाने त्यांच्या वैयक्तिक जागांवर व प्लॉटिंगवर महाविद्यालयामध्ये, शाळेमध्ये खर्च केला. यावरून काँग्रेस पक्षच कुणाची बी टीम असल्याची चर्चा भोकरदन शहरातील नागरीक करत आहेत. आम्ही आघाडीसाठी तयार होतो मात्र नगराध्यक्ष पदासाठी मुळ ओबीसी महिला उमेदवारास महाविकासआघाडीच्या वतीने संधी द्यावी अशी विनंती आम्ही काँग्रेस पक्षाकडे केली होती. मात्र काँग्रेस पक्षाला त्यांचा पक्ष एका कुटुंबापुरता मर्यादित न ठेवता उचित विचार केला असता तर आघाडी झाली असती. परंतु नगराध्यक्ष पदाच्या हट्टामुळे काँग्रेसने आघाडी तोडली. असे देखील मा.आ.चंद्रकांत दानवे यांनी सांगितले.
2022 पासुन भोकरदन शहरावर व नगरपरिषदेवर प्रशासक राज असुन माजी खा. रावसाहेब दानवे व आ.संतोष दानवे यांचे मर्जितील अधिकारी आणुन भाजपाच्या कार्यालयातुन नगरपरिषदेचे कामकाज करत असुन नगरपरिषदेचा निधी सार्वजनिक व गरजेच्या ठिकाणी न वापरता स्वत:च्या प्लॉटिंग, महाविद्यालय, शाळा यासाठी वापरला असुन शहरातील नागरीकांना रस्ते, पाणी, वीज, नाली, स्वच्छता अशा गंभीर समस्या असतांना देखील त्यांनी जनतेचा विचार न करता नगरपरिषदेचा निधी सार्वजनिक बांधकाम विभागास हस्तांतरीत करून गैरवापर केला असुन पंधरा-पंधरा दिवस शहरातील नागरीकांना पाणी उपलब्ध झाले नाही. असे त्यांनी म्हटले. तसेच रा.काँ.पा.शरदचंद्र पवार पक्षाचा नगराध्यक्ष झाल्यावर तातडीने खडकपुर्णा प्रकल्पातुन भोकरदन शहराला पाणी उपलब्ध करून देण्यात येईल व दानापुर येथुन आलेली पाण्याची पाईपलाईन जीर्ण झाल्याने त्याही पाईपलाईनचे नवीन काम करून शहरासाठी मुबलक पाणी उपलब्ध करून देण्यात येईल असे मा.आ.दानवे म्हणाले.
यावेळी युवानेते सुधाकर दानवे, युवक तालुकाध्यक्ष प्रा.डॉ.अंकुश जाधव, मा.उपनगराध्यक्ष शफिक शेठ पठाण, शहराध्यक्ष नईम कादरी, शमीम मिर्झा, नसिम पठाण, शब्बीर कुरेशी, अब्दुल कदीर बापु, अजहर शहा, योगेश शर्मा, राजेंद्र जाधव, राजु खिरे, मुजिब कादरी, अभिमन्यु जाधव, राजु इंगळे, गंगाधर कांबळे, शफी शेख, रामेश्वर जंजाळ, महेश औटी, धनराज भारती, विशाल शेजुळ, अरबाज कुरेशी, शारदाताई लाड, हमदु चाऊस, आमेर पठाण, चंद्रकांत पगारे आदी रा.काँ.पा.शरदचंद्र पवार पक्षाचे पदाधिकारी कार्यकर्ते उपस्थित होते.
