तभा फ्लॅश न्यूज/माहूर : प्रधानमंत्री आवास योजना (शहरी) अंतर्गत माहूर शहरात घरकुले मंजूर झालेल्या नागरिकांनी जुनी राहती घरे पाडून घरकुलांचे बांधकामे सुरु केली. शासनाचे अनुदानाचे पैसे लवकर मिळतील या अपेक्षेने अनेकांनी पदरमोड व उधार उसनवार, खासगी कर्जे घेऊन अनेकांनी घरकुलांचे बांधकाम पूर्ण केले,परंतु घरकुलाचे संपूर्ण हप्ते अद्याप पर्यत मिळाले नाहीत.
पहिल्या डीपीआर मधील ७६ लाभार्थ्यांना मंजूर २ लाख ५० हजार रुपये अनुदान पैकी केवळ २ लाख ३० हजार रुपये मिळाले असून उर्वरित २० हजार रुपये अद्यापही थकीत आहेत. एकूण चार डीपीआर मधील १,१०३ लाभार्थ्यांपैकी १,०२७ लाभार्थ्यांचे ५० हजार रुपयांचे हप्ते अद्याप थकीत आहेत. अनुदानाचे पैसे वेळेत न मिळाल्याने लाभार्थी आर्थिक अडचणीत आले आहेत. त्यामुळे सदर लाभार्थ्यांचे थकीत असलेले हप्ते तातडीने लाभार्थ्यांना देण्यात यावेत ,अशी विनंती करूनही शासनाकडून घरकुल लाभार्थ्यांची रक्कम मिळाली नसल्याने तसेच आनंद पाटील तूपदाळे यांनी वारंवार मुख्यमंत्री, पालकमंत्री , खासदार, आमदार , जिल्हाधिकारी,मुख्याधिकारी यांना निवेदने देऊनही दखल झाली नसल्याने नाईलाजाने आज दि. 22 जुलै रोजी तहसील कार्यालयासमोर काँग्रेसचे जिल्हा सरचिटणीस आनंद पाटील तूपदाळे यांच्या नेतृत्वात शेकडो नागरिकांनी आमरण उपोषण सुरू केले आहे.
माहूर शहरातील अनेक नागरिकांकडे स्वतःच्या जागा उपलब्ध नाहीत अशा लाभार्थ्यांना पंतप्रधान घरकुल योजने अंतर्गत म्हाडा तर्फे घरकुल बांधकाम करण्यासाठी शासनामार्फत जागा उपलब्ध करून देऊन घरकुल योजनेचा लाभ देणे आवश्यक आहे.
शासनाच्या विविध आवास योजनेतील घरकुल लाभार्थ्यांना मोफत ५ ब्रास रेती उपलब्ध करून देण्याचेही आदेश देण्यात आले. त्यानुसार माहूर शहरातील आवास योजनांच्या ६०० लाभार्थ्यांना ५ ब्रास रेतीचे मोफत वाहतूक पास देणे आवश्यक असतांना माहूर तालुका प्रशासनाच्या ढिसाळ नियोजनाच्या अभावाने केवळ ४० लाभार्थ्यांना मोफतमध्ये केवळ ३ ब्रास रेती ती सुद्धा अत्यंत निकृष्ट दर्जाची रोडा मिश्रित रेती उपलब्ध करून देण्यात आली. ५४० लाभार्थी आद्याप मोफत ५ ब्रास रेती पासून वंचित आहेत.
करिता उर्वरित ५४० आणि आधीचे हजारो लाभार्थ्यांना तातडीने मोफत ५ ब्रास रेती उपलब्ध करून द्यावी यासह इतर मागणी घेऊन काँग्रेसचे जिल्हा सरचिटणीस आनंद पाटील तुपदाळे यांचेसह शेकडो नागरिक भर पावसाळ्यात माहूरच्या तहसील कार्यालया समोर आमरण उपोषणास बसले आहेत.
