सोलापूर – महाराष्ट्रामध्ये सोलापूर शहर हे रोल मॉडेल आहे असे बनवून नागरिकांनी दाखवले आहे, यामध्ये पोलीस प्रशासनाचा कोणताही रोल नाही आम्ही फक्त सर्वांना मार्ग दाखवण्याचे काम करतो. यामध्ये फक्त डीजे डॉल्बीचाच निर्णय नसून सर्व जाती धर्मातील लोकांनी सामाजिक सलोखा कशा पद्धतीने राखला पाहिजे हे सोलापूरकरांनी दाखवून दिले आहे. या दोन वर्षांच्या कार्यकाळात पोलीस आयुक्त म्हणून मी कार्यकाळ केला याचा मला अभिमान असल्याचे मत पोलीस आयुक्त एम. राजकुमार यांनी शांतता कमिटी बैठकीवेळी मांडले.
छत्रपती शिवाजी महाराज जयंती निमित्त पोलीस आयुक्तालय येथे दि. 10 फेब्रुवारी रोजी सर्व मंडळांच्या उपस्थितीत व पोलीस अधिकारी महापालिका अधिकारी एम.ई.सी.बी व इतर प्रशासनाच्या अधिकाऱ्यांच्या उपस्थितीत शांतता कमिटीची बैठक पार पडली.
छत्रपती शिवाजी महाराज जयंती मध्ये सुरुवातीलाच डॉल्बीमुक्त मिरवणुका काढण्यात येणार असल्याची घोषणा झाल्याने 80 टक्के कायदा व सुव्यवस्थेचा प्रश्न संपतोय. मध्यवर्तीच्या या निर्णयाचे स्वागत व अभिनंदन आम्ही करतो. शिवजयंती काळामध्ये सर्व समस्या सोडवण्याचा प्रयत्न आम्ही करू असे आश्वासन आयुक्त पोलीस आयुक्त एम.राजकुमार आणि महापालिका आयुक्त डॉक्टर सचिन ओंबासे यांनी दिले.
या बैठकीवेळी उपायुक्त पोलीस उपायुक्त विजय कबाडे, पोलीस उपायुक्त गौहर हसन, पोलीस उपायुक्त अश्विनी पाटील, अतिरिक्त आयुक्त संदीप कारंजे, नगर अभियंता सारिका अकुलवार आदी पोलीस, महापालिका व प्रशासनामधील अधिकारी कर्मचारी व छत्रपती शिवाजी महाराज जयंती निमित्त आलेले शिवभक्त मोठ्या संख्येने उपस्थित होते.
