करमाळा – तालुक्यातील जिल्हा परिषद प्राथमिक शाळा खातगाव नंबर एक शाळेतील 23 विद्यार्थी व दोन शिक्षकांची नावे थेट चंद्रावर पाठवली जाणार आहेत. आंतरराष्ट्रीय अवकाश संशोधन संस्था अर्थात नासाच्या आर्टेमिस – २ मोहिमेत त्यांचा ऐतिहासिक सहभाग नोंदविला जाणार आहे. शाळेच्या वैभवात भर टाकणारे आणि अभिमानाचे साक्षीदार असणारे या विद्यार्थ्यांच्या नावांचे बोर्डिंग पास नासाकडून देण्यात आले आहे.
तब्बल 54 वर्षांनी नासा चंद्रावर चार अंतराळवीर पाठवणार आहे. नासामार्फत राबविल्या जाणाऱ्या या मोहिमेत वर्चुअल गेस्ट म्हणून सहभागी होण्याबाबत नासाने आवाहन केले होते. या उपक्रमात खातगाव नं.1 शाळेने विद्यार्थ्यांची आणि शिक्षकांचीऑनलाइन पद्धतीने यशस्वीरित्या नोंदणी केल्यानंतर नासाकडून त्यांना बोर्डिंग पास पाठविण्यात आले.
या विद्यार्थ्यांची नावे एका एसडी कार्ड मध्ये संग्रहित करून ओरियन यानाद्वारे चंद्राकडे पाठविले जाणार आहेत. यामध्ये समीना शेख, रुकसार शेख, शुभांगी पल्लारे, तेजस कोकरे, कार्तिकी कोकरे, गणेश आरदड, सफिया शेख, राधिका कोकरे, सार्थक वाघमोडे, कल्याणी आरदड, अक्षरा कोकरे, श्रेया कोकरे, वेदिका धायगुडे, श्रेयश धायगुडे, करण पल्लारे, शिवराज कवडे , जयवर्धन झेंडे, राजवीर गुळवे , दिलशाद शेख, तनुजा कोकरे, श्रेया झेंडे, वेदिका कोकरे, आदित्य कोकरे या विद्यार्थ्यांचे व शिक्षक बाळासाहेब बोडखे आणि बिभीषण सातपुते यांच्या नावांचा समावेश आहे.
राष्ट्रपती पुरस्कार प्राप्त आयसीटी शिक्षक विक्रम आडसूळ यांच्या प्रेरणेतून आणि मार्गदर्शनाखाली शाळेतील शिक्षक बाळासाहेब बोडखे यांनी विद्यार्थ्यांच्या उज्वल भविष्यासाठी एक पाऊल म्हणून यामध्ये सहभाग नोंदवला आहे. आर्टेमिस-२ ही मोहीम एप्रिल 2026 पूर्वी फ्लोरिडातील केनेडी स्पेस सेंटर इथून प्रक्षेपित होईल. अंतराळवीर चंद्राच्या पलीकडे सुमारे 6 लाख 85 हजार मैलाचा प्रवास करून पॅसिफिक महासागरात परतणार आहेत.
या उपक्रमाबद्दल शिक्षणाधिकारी कादर शेख, गटशिक्षणाधिकारी नितीन कदम, शि. वि. अ. जयवंत नलावडे, जगताप मॅडम, मिनीनाथ टकले यांनी शाळेतील शिक्षक बाळासाहेब बोडखे, बिबीशन सातपुते आणि सर्व विद्यार्थ्यांचे विशेष कौतुक केले आहे.
