अक्कलकोट – महाशिवरात्रीच्या पावन पर्वानिमित्त ता. अक्कलकोट येथील गौडगाव बु. मधील श्री जागृत हनुमान मंदिर परिसरात रविवारी पहाटेपासूनच भक्तिमय वातावरण निर्माण झाले होते. मंदिरात पहाटे मुख्य पुजारी ज्ञानेश्वर फुलारी यांच्या हस्ते भगवान शंकरांची विधिवत पूजा संपन्न झाली. मंत्रोच्चारांच्या निनादात आणि घंटानादाच्या मंगल ध्वनीत मंदिर परिसर शिवमय झाला होता.
महाशिवरात्री निमित्त महारुद्र अभिषेक, शिवस्तोत्र पठण, लिंगाष्टकम, होम-हवन आदी विविध धार्मिक कार्यक्रम मोठ्या भक्तिभावाने पार पडले. रुद्राच्या मंत्रांनी वातावरण भारावून गेले असून उपस्थित भाविकांनी ‘हर हर महादेव’च्या जयघोषात सहभागी होत आध्यात्मिक आनंदाची अनुभूती घेतली. अभिषेकासाठी दूध, दही, बेलपत्र, फुले अर्पण करून भाविकांनी मनोभावे पूजा अर्चा केली. पहाटेपासूनच दर्शनासाठी भाविकांच्या रांगा लागल्या होत्या. दिवसभर मंदिर दर्शनासाठी खुले ठेवण्यात आले होते.
सोलापूर, कलबुर्गी, इंडी, अक्कलकोट, अफझलपूर, मणूर, माशाळ, आळंद, सिंदगी आदी विविध भागांतून हजारो भाविकांनी उपस्थिती लावत दर्शनाचा लाभ घेतला. मंदिर परिसरात शिस्तबद्ध रांगा लावण्यात आल्या होत्या. भाविकांना सुलभ व सुरळीत दर्शन मिळावे यासाठी मंदिर समितीचे अध्यक्ष श्रीकांत खानापूरे, विश्वस्त प्रकाश मेंथे, सिद्राम वाघमोडे, शांतय्या स्वामी, प्रकाश सनकळ, परमेश्वर सुतार, मल्लिनाथ म्हेत्रे, श्रीमंत म्हेत्रे, श्रीमंत सवाळतोट आदींनी विशेष परिश्रम घेतले.
स्वयंसेवकांनीही दर्शन रांग नियोजन, पिण्याच्या पाण्याची व्यवस्था व सुरक्षा याकडे लक्ष दिले. महाशिवरात्रीच्या निमित्ताने दिवसभर भक्ती, श्रद्धा आणि आध्यात्मिकतेचा संगम अनुभवायला मिळाला. मंदिर परिसर ‘हर हर महादेव’च्या जयघोषाने दुमदुमून गेला होता. फोटो ओळ:- श्रीक्षेत्र गौडगाव येथे जागृत हनुमान मंदिरात महाशिवरात्री निमित्त विविध धार्मिक कार्यक्रम संपन्न
