सोलापूर : महानगरपालिका सार्वत्रिक निवडणूक अनुषंगाने नागरिकांमध्ये मतदानाबाबत जागरूकता वाढविण्यासाठी महानगरपालिकेच्या वतीने सर्जनशील व लोकसहभागात्मक उपक्रम राबविण्यात येत आहेत. “प्रत्येक मताचे महत्त्व” हा संदेश प्रभावीपणे पोहोचविण्यासाठी एन.यू.एल.एम. (National Urban Livelihoods Mission) अंतर्गत कार्यरत महिला बचत गटांचा सक्रिय सहभाग या उपक्रमांना लाभत आहे.
या मतदान जनजागृती मोहिमेत शहरातील ६०० महिला बचत गट सदस्यांनी सहभाग नोंदविला असून, सोलापूर शहरातील २५ प्रमुख ठिकाणी बैठका, संवाद सत्रे व जनजागृती कार्यक्रमांचे आयोजन करण्यात आले. या कार्यक्रमांमधून नागरिकांना मतदानाचा हक्क, त्याचे महत्त्व तसेच लोकशाही प्रक्रियेत सक्रिय सहभाग घेण्याचे आवाहन करण्यात आले.
कार्यक्रमादरम्यान महिला बचत गट सदस्यांनी मतदान करण्याची शपथ घेतली असून, इतर नागरिकांनाही मतदानासाठी प्रवृत्त करण्याचा संकल्प व्यक्त केला. महिला शक्तीच्या सशक्त सहभागामुळे मतदान जनजागृती मोहिमेला व्यापक स्वरूप प्राप्त झाले असून, आगामी महानगरपालिका निवडणुकीत मतदानाचा टक्का वाढविण्यास हे उपक्रम निश्चितच उपयुक्त ठरणार आहे.
दरम्यान, गुरुवार दि. १५ जानेवारी २०२६ रोजी सकाळी ७.३० ते सायंकाळी ५.३० या वेळेत होणाऱ्या मतदानात सोलापूरकरांनी शंभर टक्के मतदान करून आपला हक्क व कर्तव्य बजावावे, असे आवाहन आयुक्त तथा मुख्य निवडणूक अधिकारी डॉ. सचिन ओम्बासे यांनी केले आहे.
