वैराग – “स्वच्छता हाच खरा धर्म” आणि “देव देव्हाऱ्यात नसून तो माणसात व स्वच्छतेत आहे” हा संदेश आयुष्यभर कृतीतून देणाऱ्या राष्ट्रसंत श्री गाडगेबाबा महाराज यांची जयंती आज झाडी (गौडगाव) येथे अत्यंत अनोख्या पद्धतीने साजरी करण्यात आली. येथील ‘एकता महिला मंच’ च्या वतीने केवळ फोटोचे पूजन करण्याच्या पारंपारिक पद्धतीला फाटा देत, प्रत्यक्ष हातात झाडू घेऊन परिसर स्वच्छ करत बाबांना खऱ्या अर्थाने अभिवादन करण्यात आले.
विचारांची पेरणी अन् कृतीची जोड
आज २३ फेब्रुवारी २०२६ रोजी गाडगेबाबांच्या जयंतीनिमित्त सर्वत्र हार-फुले अर्पण करून पूजन केले जात असताना, एकता महिला मंचच्या सदस्यांनी मात्र बाबांच्या ‘हातातल्या खराट्याचा’ वारसा पुढे नेला. गावातील अंगणवाडी, व जिल्हा परिषद शाळा परिसरात या महिलांनी एकत्र येत संपूर्ण परिसर झाडून लख्ख केला.
केवळ औपचारिक पूजन करण्यापेक्षा गाडगेबाबांच्या विचारांची अंमलबजावणी करणे हीच खरी आदरांजली आहे, असा आदर्श या महिलांनी समाजासमोर ठेवला आहे. उपस्थित महिलांनी यावेळी केवळ मंदिरच नव्हे तर संपूर्ण गाव स्वच्छ ठेवण्याचा संकल्पही सोडला.
सहभागी रणरागिणी:
या प्रेरणादायी उपक्रमात एकता महिला मंचच्या खालील सदस्यांनी सक्रिय सहभाग घेतला:
आशा चव्हाण,स्वाती मते
सरोजा मते,पल्लवी जगदाळे
कोमल वाघमारे,संध्या सरवदे
गावातून होतेय कौतुक!
गाडगेबाबांनी आयुष्यभर समाजातील अंधश्रद्धा आणि घाण दूर करण्यासाठी काम केले. त्यांच्या जयंतीनिमित्त केवळ भाषणांवर भर न देता प्रत्यक्ष कृतीतून ‘स्वच्छता अभियान’ राबवल्याबद्दल एकता महिला मंचचे सर्व स्तरातून कौतुक होत आहे. झाडी परिसरातील इतर मंडळांसाठी देखील हा उपक्रम एक दिशादर्शक ठरणार आहे.
“बाबांनी हातात झाडू घेऊन जग स्वच्छ करायला शिकवलं, आम्ही आज फक्त त्यांच्या मार्गावर चालण्याचा छोटासा प्रयत्न केला.”
— आशा चव्हाण एकता महिला मंच प्रमुख, झाडी )
