माहूर / नांदेड – श्रीक्षेत्र माहूर गडावरील राज्यातील देवीच्या साडेतीन शक्तिपीठांपैकी एक मूळ जागृत पीठ असलेल्या श्री रेणुकादेवी मंदिर गडावर केंद्रीय रस्ते वाहतूक मंत्री नितीन गडकरी यांनी मातेच्या दर्शनासाठी २५० गड पायऱ्या चढणे-उतरणे असमर्थ असलेल्या भाविकांच्या सुविधेसाठी ५१ कोटी रुपयांचा भरीव निधी देऊन लिफ्ट आणि स्कायवाकच्या कामाला मंजुरी दिली होती. त्या प्रकल्पाचे काम अनेक अडथळे पार करत संथगतीने का होईना सध्या प्रगतीपथावर आहे.परंतु ह्या प्रकल्पाचे काम करताना पायऱ्या चढताना उजव्या बाजूला दुकाने असलेल्या अनेक लघुव्यवसायिकांच्या उदरनिर्वाहाचे साधन असलेल्या दुकानांना स्थलांतरित करण्याचा यक्षप्रश्न निर्माण झाला आहे .मात्र आता प्रशासनाकडून यावर उचित तोडगा काढण्यात आला असून,संभाव्य पार्किंगच्या ठिकाणी गाळे निर्मिती करून त्यांना प्रतिष्ठान रिकामी करण्यात सांगण्यात आल्याने दि.२४ नोव्हेंबर रोजी लघु व्यावसायिकांनी तहसीलदार अभिजीत जगताप यांच्या उपस्थितीत आपले प्रतिष्ठान रिकामे करण्यास सुरुवात केल्याने लिफ्ट आणि स्काय वॉकच्या कामाला आता खऱ्या अर्थाने गती मिळण्याचा मार्ग मोकळा झाला आहे.
श्रीक्षेत्र माहूर गडावरील श्री रेणुका माता मंदिरात येणाऱ्या वयोवृद्ध भाविकांना अडीचशे पायऱ्या चढण्या साठी त्रास होत होता. सदरील बाब केंद्रीय मंत्री नितीन गडकरी यांच्या लक्षात आणून दिल्याने त्यांनी भाविकांना सुलभ व जलद दर्शन सुविधा मिळावी यासाठी ५१ कोटी रुपये खर्चाच्या लिफ्ट आणि स्काय वॉकच्या कामाला मंजुरी दिली होती. परंतु येथे पायऱ्याच्या शेजारी असलेल्या लघु व्यावसायिकांच्या उदरनिर्वाहाचा प्रश्न निर्माण झाला होता.त्यामुळे डाव्या बाजूकडील दरड मध्ये भराव टाकून येथे गाळे निर्मिती करण्यात आली असून, त्या ठिकाणी सदरील ३५ लघु व्यावसायिकाच्या स्थलांतराचा प्रश्न निकाली काढण्यात आला. त्यामुळे काहीं व्यवसायिकांनीआपापले प्रतिष्ठान काढून घेण्यास सुरुवात केली असून, काही प्रतिष्ठाने रिकामे करण्यात आलेली आहेत.
सदरील लिफ्ट आणि स्काय वॉक चे काम तसेच व्यवसायिकांचे स्थलांतर व इतर विकास कामे जिल्हाधिकारी राहुल कर्डिले, जिल्हा पोलीस अधीक्षक अविनाश कुमार, नांदेड जिल्ह्याचे अधीक्षक अभियंता संभाजी धोत्रे, सहाय्यक जिल्हाधिकारी जेनीत चंद्रा दोन्तूला, कार्यकारी अभियंता विशाल चोपडे तसेच श्री रेणुका देवी संस्थान प्रशासन यांचे मार्गदर्शनाखाली तहसीलदार अभिजीत जगताप, सार्वजनिक बांधकाम विभागाचे उपविभागीय अभियंता डी.के. भिसे,उपविभागीय पोलीस अधिकारी किरण कुमार भोंडवे, पोलीस निरीक्षक देविदास चोपडे, पोलीस उपनिरीक्षक संदीप अन्येबोईनवाड, सहाय्यक पोलीस उपनिरीक्षक बाबू जाधव, क.अभियंता पवन हंचाटे,सहाय्यक अभियंता प्रफुल कांबळे, स्थापत्य अभियंता सहाय्यक संतोष भोकरे, विश्वनाथ कांबळे, श्री रेणुका देवी संस्थानचे व्यवस्थापक योगेश साबळे व गुरुबक्षानी कंट्रक्शन कंपनी यांचे मार्गदर्शनाखाली प्रगतीपथावर असून, आता दुकाने स्थानांतरण सुरू होण्यास सुरुवात झाल्याने लिफ्ट आणि स्कायवॉकच्या कामाला गती मिळणार आहे.
त्यामुळे लवकरच नजिकच्या काळात श्री रेणुकादेवी मंदिरच्या जवळपास अडीचशे पायऱ्या चढणे-उतरणे करण्यासाठी असमर्थ असलेल्या भाविकांच्या सोयीसाठी लिफ्ट आणि स्कायवॉक हा अत्याधुनिक तंत्रज्ञानाचा प्रकल्प धावणार असल्याचे दिसून येत आहे.
