सोलापूर – शहरातील पूर्व भागात असणाऱ्या श्री वेंकटेश्वर देवस्थान मध्ये गेल्या दोन दिवसांपासून श्री वेंकटेश्वर भगवान यांचा ब्रह्मोत्सव हा धार्मिक कार्यक्रम सुरू असून, शनिवारी सकाळी ब्रह्म मुहूर्तावर ५ .३० वाजता मुळमुर्ती अभिषेक , सकाळी ९.३० ते १२.०० होमहवन, पूर्णाहुती, हनुमान वाहन सेवा, अर्पण करण्यात आली. यावेळी मंदिरात गोविंदा हरी गोविंदा श्री व्यंकट रमणा गोविंदा… हा जयघोष दुमदुमला.
श्रीदेवी भुदेवी समेत श्री वेंकटेश्वर स्वामी दिव्यरथोत्सवास सायंकाळी साडेसहा वाजता मोठ्या उत्साहात सुरुवात झाली. तत्पूर्वी दुपारी चार वाजण्याच्या सुमारास श्री वेंकटेश्वर स्वामी रथोत्सव मिरवणुकीची तयारी सुरू करण्यात आली. तिर्थप्रसाद गोष्टी व सायं. ४, वाजता श्री श्रीदेवी भुदेवी समेत श्री वेंकटेश्वर स्वामी दिव्यरथोत्सवम मंदिरापासून मिरवणूक सोहळा मोठ्या उत्साही आणि मंगलमय वातावरणात संपन्न झाला.
दरम्यान, भगवंताची रथोत्सव मिरवणूक जोडबसवण्णा चौक, राजेंद्र चौक, कन्ना चौक, औद्योगिक बँक, मार्कंडेय चौक, भद्रावती पेठ, दत्त चौक, पद्मशाली चौक या मिरवणूक मार्गावरून पुन्हा मंदिराकडे संपन्न झाली. रात्री नऊ वाजण्याच्या सुमारास महाआरती व प्रसाद वाटप कार्यक्रम संपन्न झाल्याची माहिती मंदिर समितीने दिली. यावेळी दक्षिणात्य मंगल वाद्यांच्या तालावर धार्मिक विधी आणि कार्यक्रम संपन्न होत असून भाविकांमध्ये उत्साहाचे आणि आनंदाचे वातावरण दिसून आले. मिरवणूक मार्गावर रस्त्याच्या दुतर्फा भाविकांची गर्दी होती. श्रींच्या दर्शनासाठी प्रत्येक भाविक आसुसलेला होता. श्रींना पुष्प अर्पण करून अनेक भाविकांनी यथोचित दर्शन घेतले.
श्री व्यंकटेश्वर देवस्थान मध्ये दरवर्षीप्रमाणे यावर्षी देखील ब्रह्मोत्सव तिरुमाला तिरुपती मंदिर समितीच्या दक्षिणात्य परंपरेनुसार सुरू आहे. हा धार्मिक उत्सव संपन्न करण्यासाठी दाक्षिणात्य पुजारी तसेच ब्रह्मरुंद सोलापुरात दाखल झाले आहेत. श्रींचा कल्याणोत्सव आणि रथोत्सव हा धार्मिक विधी दक्षिणात्य धार्मिक परंपरेनुसार संपन्न झाले. यावेळी सोलापूर शहरातील असंख्य भाविक रथोत्सव मिरवणुकीसाठी तसेच श्रींच्या दर्शनासाठी आवर्जून उपस्थित असल्याचे दिसून आले. तर आज ८१ कळशाभिषेक , संध्याकाळी गरुड वाहन पालखी सेवा संपन्न होणार आहे.
