पारध / जालना – आपल्याला कायम निरोगी जीवन जगायचे असेल तर आपला आहार विहार योग्य ठेवा,नियमित व्यायाम करा आणि पुरेशी झोप घ्या.त्यामुळे तुमचे आयुष्य निरोगी होईल ,असा सल्ला छ. संभाजीनगर येथील मूळव्याध तज्ञ डॉ.प्रवीण बेराड यांनी पारध येथे आयोजित कार्यक्रमात दिला.
भोकरदन तालुक्यातील पारध येथील जनता माध्यमिक व उच्च माध्यमिक विद्यालयात शुक्रवार दि.२८ रोजी ‘आहारातून समृद्धीकडे’ उपक्रमांतर्गत डॉ.प्रवीण बेराड यांच्या व्याख्यानाचे आयोजन करण्यात आले होते.यावेळी मार्गदर्शन करतांना डॉ. बेराड म्हणाले की,गायीच्या गावरान तुपात मोठ्या प्रमाणात औषधी तत्व असल्याने लहान मुलांची बौद्धिक क्षमता वाढविण्यासाठी मदत करते.त्यामुळे लहानथोरानी आपल्या आहारात गावरान तुपाचा जास्तीत जास्त वापर करावा त्यामुळे आपली पचनक्रिया योग्य प्रमाणात काम करते आणि मूळव्याधीसारख्या जीवघेण्या आजारापासून आपण दूर राहू शकतो.
पाण्याला जीवन असे म्हणतात पण वैद्यकीय भाषेत पाणी जर मर्यादेपेक्षा जास्त पिल्यास तेच पाणी मृत्यू बनू शकते म्हणून पाणी सुद्धा योग्य प्रमाणात प्यावे असाही सल्ला डॉ. बेराड यांनी यावेळी दिला तर पचनक्रिया व्यवस्थित राहावे म्हणून आपला आहार मर्यादित असावा,विरुद्ध आहार टाळावा,झोप पुरेशी घ्यावी याशिवाय विविध व्यायायासंदर्भात देखील त्यांनी सखोल मार्गदर्शन केले.विद्यार्थ्यांनी उपस्थित केलेल्या शंकेचे निरसन सुद्धा डॉ. बेराड यांनी या कार्यक्रमादरम्यान केले.
या कार्यक्रमाच्या अध्यक्षस्थानी संस्थेचे संचालक सुनील वानखेडे हे होते तर प्रमुख पाहुणे म्हणून डॉ.देवेंद्र बेराड,तंटामुक्तीचे माजी अध्यक्ष संजय लोखंडे,पर्यवेक्षक महेंद्र लोखंडे, प्रा. एन. एन. पाटील, प्रा.संग्रामराजे यांची उपस्थिती होती.
या कार्यक्रमाचे प्रस्ताविक मृदुला काळे यांनी केले.यावेळी रवी लोखंडे,संतोष पाखरे,बंटी बेराड, गजानन महाले, आर. ए.देशमुख, प्रा.सुनील हजारे,प्रा.विनोद सोनगीरे, प्रा. सुनील पायघन, लता वानखेडे यांच्यासह विद्यार्थी, शिक्षक, शिक्षकेतर कर्मचारी,ग्रामस्थ उपस्थित होते.
