सोलापूर- श्री मार्कंडेय प्रशाला व श्री सिद्धेश्वर ज्युनि.कॉलेज विडी घरकुल, कुंभारी येथे जागतिक महिला दिन व वार्षिक पारितोषिक वितरण समारंभ थाटात संपन्न झाला. या कार्यक्रमाचे अध्यक्षस्थानी प्रशालेचे मुख्याध्यापक अमोघसिद्ध कुंभार होते तर जिल्हाधिकारी कार्यालयातील संजय गांधी निराधार योजनेच्या तहसीलदार शिल्पा पाटील व नूतन जि. प. सदस्या श्रुती भोरगुंडे या प्रमुख पाहुण्या म्हणून उपस्थित होत्या.
कार्यक्रमाची सुरुवात क्रांतीज्योती सावित्रीबाई फुले यांच्या प्रतिमा पूजनाने व स्वागत गीताने झाली. प्रमुख पाहुण्यांचा परिचय अश्विनी पडनूरकर यांनी करून दिल्य.त्यानंतर प्रमुख पाहुण्यांचा सत्कार ज्येष्ठ शिक्षिका कालिंदी कांबळे व रुपा भोगडे यांच्या हस्ते करण्यात आले. यावेळी महिला दिनानिमित्त विद्यार्थिनींनी भाषणे व कविता सादर केल्या. प्रशालेतील व ज्युनिअर कॉलेज मधील सर्व महिला शिक्षकांचा प्रशालेच्या वतीने प्रमुख पाहुण्यांच्या हस्ते भेटवस्तू व गुलाब पुष्प देऊन सन्मान करण्यात आला. यावेळी कबड्डी, खो-खो, क्रिकेट, हॉलीबॉल आदि क्रीडा स्पर्धेत,शिष्यवृत्ती, एन. एन. एम. एस. परीक्षा व वक्तृत्व स्पर्धेत यश मिळविलेल्या प्रशालेतील यशस्वी विद्यार्थ्यांचा सत्कार करण्यात आला.
यावेळी बोलताना पाटील म्हणाल्या, शिक्षण हा आपल्या विकासाचा पाया आहे. परिस्थिती ही कधीही शिक्षणाच्या आड येत नाही..प्रयत्न आणि चिकाटी माणसाला यशापर्यंत नेऊन पोहोचवते. म्हणून मुलींनी आपल्या मनात परिस्थितीची न्यूनगंड न बाळगता कर्तुत्वाने जीवनात यशस्वी व्हावे असे सांगून मोबाईलचे वाईट परिणाम त्यांनी समजावून सांगितल्या व मोबाईल पासून दूर राहण्याचे आवाहन केले.
आपल्या अध्यक्षीय भाषणात कुंभार यांनी महिला सक्षमीकरणाचे महत्त्व सांगितले. यावेळी प्रशालेतील विद्यार्थिनींनी वेगवेगळ्या प्रकारची वेशभूषा परिधान करून कार्यक्रमाची शोभा वाढवली. प्रास्ताविक लक्ष्मी पाटील यांनी केले. कार्यक्रमाचे सूत्रसंचालन व आभार अश्विनी पडनूरकर यांनी केले. कार्यक्रम यशस्वी करण्यासाठी प्रशालेतील व जुनिअर कॉलेज मधील सर्व प्राध्यापक- प्राध्यापिका, शिक्षक- शिक्षिका व शिक्षकेतर कर्मचारी यांनी प्रयत्न केले.
