इस्रायल आणि हमास यांच्यात संघर्ष पेटल्यानंतर आता, भारत सरकारने ऍडव्हायजरी जारी केली आहे. हमासच्या दहशतवाद्यांनी आज, शनिवारी पहाटेपासून इस्त्रायलवर हल्ला सुरू केलाय. आतापर्यंत 5 हजार रॉकेट हल्ले केल्याचे हमासने म्हंटलेय. तर इस्त्रायलने हमास विरोधात युद्धाची घोषणा केलीय.
या संघर्षाच्या पार्श्वभूमीवर भारताने इस्रायलमध्ये राहणाऱ्या भारतीय नागरिकांना सतर्क रहण्याचे आवाहन केले आहे. याच बरोबर, इस्रायलच्या स्थानिक अधिकऱ्यांनी सुरक्षिततेच्या दृष्टीने जारी केलेल्या प्रोटोकॉलचे पालन करण्याचा सल्लाही भारत सरकारने दिला आहे.यासोबतच भारतीय नागरिकांनी अनावश्यक हलचाली टाळा आणि सुरक्षित ठिकाणी रहा. असा सल्लाही भारत सरकारने आपल्या इस्रायलमधील नागरिकांना दिला आहे.
या हल्ल्यानंतर इस्रायलच्या अनेक भागांत सायरन वाजले. पंतप्रधान नेतन्याहू यांच्या कार्यालयाने सांगितले की, पंतप्रधान आणि संरक्षण मंत्री तेल अवीवमध्ये संरक्षण दलाच्या मुख्यालयात सुरक्षेसंदर्भात मूल्यमापन करत आहेत. या शिवाय, इस्रायलने आपल्या नागरिकांना घरातच राहण्याचे आदेश दिले आहेत.हमासच्या या हल्ल्याविरोधात इस्रायलने ‘ऑपरेशन आयर्न स्वॉर्ड्स’ची घोषणा केली आहे. हमासने गंभीर चूक केल्याचे इस्रायलच्या संरक्षण मंत्र्यांनी म्हटले आहे. दक्षिण इस्रायलमध्ये 21 ठिकाणी हमासच्या घुसखोर दहशतवाद्यांनी हल्ले केले आहेत. या सर्व घडामोडी पाहून अमेरिकेने आपण इस्रायलसोबत उभे राहणार असल्याचे जाहीर केले आहे. इस्रायलमधील हमास हल्ल्याचे जे फोटो, व्हिडीओ येत आहेत. यामध्ये मृत आणि जखमी झालेल्या लोकांना पाहून विचलित होत आहे. या घटनेत आम्ही इस्रायलच्या पाठीशी उभे आहोत, असे अमेरिकेच्या यूएस चार्ज अफेयर्सने म्हटले आहे.
