तब्बल 20 तास चाललेल्या सर्च ऑपरेशननंतर अंमलबजावणी संचालनालयाने (ईडी) पश्चिम बंगालचे वनमंत्री ज्योतीप्रिय मलिक यांना आज, शुक्रवारी पहाटे अटक केली. रेशन घोटाळा प्रकरणी ईडीने मलिक यांच्या घरासह 7 ठिकाणी गुरुवारी सकाळपासून शोध मोहिम राबवली होती. त्यानंतर आज, पहाटे 4 वाजता त्यांना अटक करण्यात आली. वन मंत्रालयापूर्वी मलिक यांच्याकडे अन्न आणि नागरी पुरवठा विभागाचा कार्यभार होता.
सूत्रांनी दिलेल्या माहितीनुसार, उद्योगपती बाकीबुर रहमानच्या अटकेनंतर केंद्रीय तपास यंत्रणेने मलिकच्या घरावर छापा टाकला. ईडीने कैखली येथील त्याच्या फ्लॅटवर 53 तास चाललेल्या छाप्यानंतर रेहमानला गेल्या आठवड्यात अटक करण्यात आली होती. रेहमानच्या फ्लॅटमध्ये सरकारी कार्यालयांचे शिक्के असलेली 100 हून अधिक कागदपत्रे सापडली आहेत. राईस मिलच्या व्यवसायाव्यतिरिक्त रहमानकडे अनेक हॉटेल्स, रिसॉर्ट्स आणि बार आहेत.ईडीच्या सूत्रांनी सांगितले की, रहमानच्या कंपन्यांमध्ये 50 कोटी रुपयांहून अधिक गुंतवणूक करण्यात आली होती. कोविड-19 लॉकडाऊन दरम्यान राज्यातील सार्वजनिक वितरण व्यवस्थेत अनेक अनियमितता आणि रेशन वितरणात मोठ्या प्रमाणात भ्रष्टाचार झाल्याचा आरोप करण्यात आला आहे. त्यावेळी मलिक अन्न व नागरी पुरवठा खात्याचे मंत्री होते.
