यवतमाळ : भाजपचे ज्येष्ठ नेते तथा केंद्रीय रस्ते वाहतूक मंत्री नितीन गडकरी यांना यवतमाळमधील प्रचारसभेतच भोवळ आली. भाषणाच्या सुरुवातीच्या काही मिनिटांतच त्यांना अस्वस्थ वाटू लागले. त्यांना भोवळ आल्याचे कळताच त्यांच्या अंगरक्षकांनी त्यांना मंचावरून बाजूला नेले. उपचारानंतर त्यांची प्रकृती स्थिर असल्याची माहिती कळते आहे.
यवतमाळ वाशिम लोकसभेच्या महायुतीच्या अधिकृत उमेदवार राजश्री हेमंत पाटील यांच्या प्रचारासाठी यवतमाळ जिल्ह्यातील पुसदच्या शिवाजी महाराज ग्राऊंडवर ज्येष्ठ नेते नितीन गडकरी यांची प्रचारसभा आयोजित करण्यात आली होती. बाकी नेत्यांची भाषणे झाल्यावर गडकरींनी सभेला संबोधित करायला सुरूवात केली. परंतु यवतमाळमध्ये प्रचंड तापामानाचा पारा चढल्याने त्यांना उष्णतेचा त्रास सुरू झाला. ऊन सहन न झाल्याने काही मिनिटांतच त्यांना भोवळ आली.
आजच्या दिवसातील नितीन गडकरी यांची दुसरी सभा होती. सकाळच्या सत्रात बुलढाणा जिल्ह्यातील चिखलीमध्ये त्यांची सभा पार पडली होती. दुसऱ्या टप्प्यात यवतमाळ जिल्ह्यातील पुसदमध्ये त्यांची नियोजित सभा होती. मात्र सभेतच हा प्रकार घडल्याने भाषण अर्धवट सोडून त्यांना उपचारार्थ रुग्णालयात दाखल करण्यात आले. सध्या त्यांची प्रकृती स्थिर असल्याची माहिती कळतीये.
उपचारानंतर पुन्हा भाषणाला सुरूवात…
डॉक्टरांच्या उपचारानंतर नितीन गडकरी यांना बरे वाटू लागले. काही वेळानंतर त्यांनी पुन्हा भाषणाला सुरूवात केली. देशात विकासाचे पर्व सुरू असून या पर्वात तुमच्या प्रत्येकाचे मत महत्वाचे असून महायुतीच्या उमेदवार राजश्री पाटील यांना भरभरून मतदान करा, असे आवाहन नितीन गडकरी यांनी केले.
त्यांच्या भाषणात त्यांनी नरेंद्र मोदी यांच्या कार्यकाळातील विकासकामांचा उल्लेख करत रस्ते आणि वाहतूक मंत्रालयाने केलेल्या कामाचाही पाढा वाचला. त्याचवेळी विरोधकांकडे प्रचारासाठी मुद्दे नसल्याची टीकाही केली.
या आधी गडकरींनी कधी भोवळ आली होती?
1. नोव्हेंबर 2022 मध्ये पश्चिम बंगालमध्ये एका कार्यक्रमामध्ये भोवळ आली होती. बंगालमधील सिलिगुडतील दागापूर येथील एका जाहीर कार्यक्रमात गडकरींना भोवळ आली. भाषण सुरू असतानाच त्यांना भोवळ आली होती. त्यांच्यावर तात्काल प्राथमिक उपचार करण्यात आले.
2. डिसेंबर 2018 साली राहुरी कृषी विद्यापीठाच्या कार्यक्रमातही गडकरींना भोवळ आली होती. राष्ट्रगीत झाल्यानंतर खुर्चीवर बसत असताना नितीन गडकरी यांना भोवळ आली होती. रक्तातील साखरेची पातळी कमी झाल्यानंतर गडकरींना भोवळ आली. नंतर प्राथमिक उपचार केल्यानंतर त्यांची तब्येत ठिक झाली.
3. 2019 साली शिर्डीतील एका कार्यक्रमामध्ये स्टेजवरच असताना ते कोसळले होते. उष्माघाताने त्यावेळी गडकरींनी भोवळ आल्याचं बोललं जातंय.
4. सोलापूर विद्यापीठाच्या कार्यक्रमातही राष्ट्रगीत सुरू असताना त्यांना भोवळ आली होती.
भोवळ का येते?
भोवळ येणे किंवा चक्कर येण्याला वैद्यकीय भाषेत सिनकोप (Syncope) असं म्हटलं जातंय, त्याला फिट येणं असंही म्हटलं जातं. मेंदूला अचानक रक्तपुरवठा कमी पडला तर भोवळ येते. रक्तातील साखर कमी पडल्याने किंवा जास्त झाल्यानेही भोवळ येऊ शकते. त्यामुळे हृदयाला व्यवस्थित रक्तपुरवठा होत नाही.
भोवळ आल्यानंतर त्या व्यक्तीच्या डोळ्यासमोर अंधार येऊ शकतो. कधीकधी अस्वस्थ वाटून हायपाय थरथरू शकतात. काहीवेळासाठी तो व्यक्ती शुद्ध हरपतो किंवा बेशुद्ध पडतो. पण प्राथमिक उपचार केल्यानंतर लगेच तब्येत बरी होऊ शकते.
