भाड्याच्या खोल्यांमध्ये सुरू असलेल्या अंगणवाड्यांना स्वतःची हक्काची इमारत द्या!

माहूर / नांदेड – मुलांच्या सर्वांगीण विकासाचे केंद्र असलेल्या अंगणवाड्यांमध्ये मुलांना पूर्व-शाळा शिक्षण देण्यासाठी जागा, स्वतंत्र स्वयंपाकघर,

मुलांसाठी शौचालय, पिण्याचे पाणी आणि खेळाची योग्य सोय आवश्यक असते. जिथे पोषण, आरोग्य आणि शिक्षणाशी संबंधित सेवा दिल्या जातात. परंतु माहूर शहरातील एकात्मिक बाल विकास सेवा नागरी प्रकल्प क्रमांक-३ नांदेड अंतर्गत सुरू असलेल्या १५ अंगणवाड्यांच्या खोल्यांची अवस्था अतिशय बिकट झाली असल्याने सध्या भाड्याच्या घरात सुरू असलेल्या ह्या अंगणवाड्यांना हक्काची जागा उपलब्ध करून स्वतःची इमारत देऊन सोयी सुविधा पुरवाव्यात, अशी मागणी अंगणवाडी सेविका व मदतनीसांनी माहूर नगरपंचायतचे नगराध्यक्ष फिरोज दोसानी,मुख्याधिकारी विवेक कांदे यांच्याकडे दि. ०८ डिसेंबर रोजी निवेदनाद्वारे केली आहे.

अंगणवाडी ही भारत सरकारने १९७५ मध्ये सुरू केलेली ग्रामीण माता आणि बाल संगोपन केंद्र असून, ही केंद्रे ६ वर्षांखालील मुलांसाठी आरोग्य, पोषण आणि पूर्व-प्राथमिक शिक्षण यांसारख्या सेवा पुरवतात. या केंद्रांमध्ये गर्भवती महिला, स्तनपान करणाऱ्या माता आणि ६ वर्षांपर्यंतच्या मुलांची काळजी घेतली जाते. व जेथे ३ ते ६ वयोगटातील मुलांना औपचारिक शिक्षणाची तयारी करून घेण्यासाठी शिक्षण दिले जाते.

अंगणवाडी एकात्मिक बाल विकास सेवा कार्यक्रमाचा एक भाग आहे, जो ६ वर्षांखालील मुलांसाठी आणि त्यांच्या मातांसाठी आरोग्य, पोषण आणि शिक्षण सेवा एकत्रितपणे पुरवतो.

माहूर शहरात एकात्मिक बाल विकास सेवा नागरी प्रकल्प-३ अंतर्गत १५ अंगणवाड्यात जवळपास ५०० बालकं पूर्व-प्राथमिक शिक्षण घेत आहेत. या सर्व अंगणवाड्या भाड्याच्या घरात असून, दोन अंगणवाड्या ग्रामपंचायत काळातील बांधकाम झालेल्या आहेत. त्यामुळे त्याही मोडकळीस आलेल्या आहेत त्यामुळे अनेक दिवसांपासून अंगणवाडी सेविका ह्या वरिष्ठ कार्यालय आणि नगरपंचायत कडे या अंगणवाड्यात शिक्षण घेणाऱ्या मुलांचे भविष्य धोक्यात आल्याने अंगणवाड्यासाठी नवीन जागा, नवीन इमारत आणि सेवा सुविधा पुरविण्यात याव्यात अशी मागणी करत आहेत.

सध्या ह्या अंगणवाड्या जिल्हा परिषदेच्या शाळांमध्ये किंवा भाड्याच्या जागांमध्ये चालविल्या जात असून जिथे ३ ते ६ वयोगटातील मुलांना पूर्व-प्राथमिक शिक्षण, पोषण आहार आणि आरोग्य तपासणी करावी लागते.

या अंगणवाड्यांमध्ये मुलांना खेळ-आधारित शिक्षण देण्यासाठी पुरेशी जागा, मुलांसाठी स्वतंत्र स्वच्छतागृह आणि स्वच्छ पिण्याच्या पाण्याची सोय,पौष्टिक आहार बनवण्यासाठी स्वतंत्र स्वयंपाकघर,अन्न आणि इतर साहित्य ठेवण्यासाठी स्टोअर रुम, खोलीमध्ये आणि बाहेर खेळण्यासाठी जागा अपुरी पडत आहे.तसेच याठिकाणी पूरक पोषण, लसीकरण, आरोग्य तपासणी, आणि पूर्व-शाळा शिक्षण यांसारख्या सेवा पुरविणाची जबाबदारी या अंगणवाडी सेविका व मदतनीसांना नाईलाजाने उचलावी लागत आहे.

याविषयीची वारंवार निवेदने देऊनही वरिष्ठ कार्यालयाने या मागणीकडे दुर्लक्ष केल्याने माहूर शहरातील अंगणवाडी सेविका व मदतनीसांनी आज मोठ्या अपेक्षेने नगराध्यक्ष फिरोज भाई दोसानी आणि मुख्याधिकारी विवेक कांदे यांची भेट घेऊन मागण्या सादर केल्या.

यावेळी नगराध्यक्ष आणि मुख्याधिकाऱ्यांनी कुठल्याही परिस्थितीत दोन महिन्याच्या आत जुन्या अंगणवाड्यांची दुरुस्ती आणि नवीन अंगणवाड्यासाठी शासन दरबारी पाठपुरावा करून प्रकरण निकाली काढू, असे आश्वासन यावेळी दिले. यावेळी अंगणवाडी सेविका संघटनेच्या अध्यक्षा सत्त्वशीला पंडित, वंदना जाधव, सुनीता भगत, मीना मनवर, सुनिता पवार, रेणुका पत्की, अंजली खडसे, सीमा पद्मावार, शीतल सौंदलकर, नबुबाई वानखेडे, चित्रा देशपांडे, सलमा शेख युसूफ, शारदा दूद्दलवार, कांता स्वामी, सुलोचना कमठेवाड यांचे सह कार्यालय अधीक्षक संदीप गझलवाड, लेखापाल विशाल मरेवाड, अभियंता रोहित डुकरे, विशाल ढोरे, स्वाती गुव्हाडे, धनंजय कळसकर, मझहर शेख, विजय शिंदे यांचे कर्मचारी उपस्थित होते.

शहरातील अनेक अंगणवाड्यांना स्वतःची इमारत नाही आणि त्या जिल्हा परिषदेच्या शाळांमध्ये किंवा इतर भाड्याच्या खोल्यांमध्ये चालविल्या जात आहेत. ज्यामुळे याठिकाणी सुविधांची कमतरता भासत आहे.

शासनाने अंगणवाड्यांसाठी आवश्यक पायाभूत सुविधा पुरवण्याचे निकष ठरवले आहेत, पण अंमलबजावणीत सुधारणांची गरज असल्याचे सदरील निवेदनातील मागणीवरून जाणवत आहे.