देगलूर / नांदेड : महाराष्ट्रातील अनुसूचित जाती (SC) प्रवर्गातील ५९ उपजातींमध्ये निर्माण झालेल्या असमान प्रगतीच्या पार्श्वभूमीवर अ. ब. क. ड. आरक्षण उपवर्गीकरणाचा प्रश्न पुन्हा ऐरणीवर आला आहे. सध्या काही निवडक उपजातींना शिक्षण व नोकरीतील आरक्षणाचा अधिक लाभ मिळाल्याने आजही काही घटक या संधीपासून वंचित आहेत. त्यामुळे सामाजिक न्यायासाठी अ.ब.क.ड. उपवर्गीकरण तात्काळ लागू करावे, अशी महत्वपूर्ण मागणी आ. जितेश अंतापुरकर यांनी सध्या चालू असलेल्या नागपूर येथील हिवाळी अधिवेशनात अनोख्या पद्धतीने केली आहे. दरम्यान अंतापुरकरांनी राज्यशासनाचे लक्ष वेधून घेतले आहे.
यासंदर्भात राज्य सरकारने बदर समितीची नियुक्ती केली असली तरी अहवाल सादर करण्यात होणारा विलंब हा निराशाजनक आहे. यामुळे समाजात असंतोष निर्माण होत आहे. विद्यार्थ्यांपासून रोजगार शोधणाऱ्या युवकांपर्यंत, शेतकरी कुटुंबांपासून सर्वसामान्य घटकांपर्यंत उपवर्गीकरण न लागू झाल्याने मागास घटकांना सरसकट आरक्षण यंत्रणेत मागे पडावे लागत असल्याचे चित्र सध्या तयार झाले आहे.
या पार्श्वभूमीवर देगलूर बिलोली विधानसभेचे आ. जितेश अंतापुरकर यांनी नागपूर येथे चालू असलेल्या हिवाळी अधिवेशनात मुख्यमंत्री देवेंद्र फडणवीस यांच्याकडे तातडीने निर्णय घेण्याची मागणी केली आहे. समाजाच्या वतीने आमदार अंतापुरकर म्हणाले की, “अ. ब. क. ड. आरक्षण उपवर्गीकरणाचा निर्णय आता विलंब न लावता घ्यावा. अत्यंत मागास उपजातींना न्याय, प्राधान्य आणि त्यांना हक्काचा लाभ मिळवून देणे ही सरकारची जबाबदारी आहे.
बदर समितीने घेतलेला कालावधी पुरेसा झाला असून अहवाल तातडीने सरकारसमोर यावा. डॉ. बाबासाहेब आंबेडकर यांना अभिप्रेत असलेल्या आरक्षणातून सर्व घटकांचा विकास हेच केंद्रबिंदू होते. पण सध्या उपवर्गीकरण अभावी आजही काही घटक वंचित राहत असतील, तर त्यांच्या न्यायासाठी मी शेवटपर्यंत लढणार असल्याचे मत अंतापुरकर यांनी स्पष्ट केले.”
दरम्यान विधान परिषदेचे आमदार अमित गोरखे यांनीही अ.ब.क.ड उपवर्गीकरण लागू लागू करण्यासंदर्भात आपली भूमिका मांडली असून यावेळी त्यांची उपस्थिती होती. अनुसूचित जाती (SC) प्रवर्गातील सर्व उपजातींना समान संधी मिळण्यासाठी उपवर्गीकरण ही काळाची गरज असल्याचा ठाम सूर आता समाजातील सर्व स्तरातून उमटू लागला आहे. सरकारने याबाबत तातडीचा निर्णय घेतल्यास हजारो युवक-युवतींच्या भविष्याला नवा दिशा व वेग मिळेल, अशी अपेक्षा व्यक्त केली जात आहे.
