सोलापूर – महापालिका निवडणुकीच्या अनुषंगाने सोलापूर शहरात महाविकास आघाडीच्या नेत्यांच्या बैठकीचे सत्र सुरू झाले आहे. इलेक्टीव्ह मेरिट आणि स्टॅंडिंग उमेदवारांकडे आघाडीचे नेत्यांचा कल दिसून येत आहे. त्यामुळे यंदा महाविकास आघाडी पूर्ण क्षमतेने महापालिका निवडणुकीस सामोरे जाणार असल्याचे दिसून येत आहे.
दरम्यान, आघाडीच्या संदर्भात यापूर्वी महाविकास आघाडीतील प्रमुख नेत्यांची बैठक झाली. परंतु त्या बैठकीस उद्धव ठाकरे यांच्या शिवसेनेचे नेते उपस्थित नव्हते. येत्या काही दिवसात शिवसेनेचे नेते चंद्रकांत खैरे सोलापूर दौऱ्यावर येणार आहेत. तेव्हा आणखीन एक महत्वाची बैठक संपन्न होऊन त्यात महाविकास आघाडीचा जागा वाटपाचा फॉर्मुला ठरवला जाणार आहे. त्यासाठी नेत्यांनी स्थानिक पातळीवर आघाडी करण्याची हालचाल सुरू केलेली दिसत आहे.
शरद पवार यांच्या राष्ट्रवादी काँग्रेस पार्टीचे शहराध्यक्ष महेश गादेकर यांच्या नव्या कार्यालयाचे उद्घाटनाला महाविकास आघाडीतील इतरपक्षीय नेते उपस्थित होते. तर काही नेते कार्यक्रमानंतर दुसऱ्या दिवशी महेश गादेकर यांना भेटण्यासाठी त्यांच्या ऑफिसमध्ये दाखल झाले होते. त्यावेळी देखील त्यांच्या चर्चेमध्ये हा विषय निघाला. आगामी महापालिका निवडणुकीसाठी इलेक्टिव्ह मेरिट तसेच स्टॅंडिंग उमेदवार प्राधान्यक्रम राहील त्यानंतर इच्छुक उमेदवारांची चाळणी करून त्याबाबत योग्य तो निर्णय घेण्यात येईल असेही यावेळी सांगण्यात आले.
आरक्षण आणि मतदारांचा घोळ
आरक्षण सोडत काढताना प्रशासनाने निष्काळजीपणा केला. इतके वर्ष निवडणूक लढवली कधीही दोनदा आरक्षण सोडत निघाली नाही. प्रशासनाचा नाकारतेपणा यानिमित्ताने समोर आला आहे. त्याचपद्धतीने मतदार याद्यांचा घोळ करण्यात आला आहे. असंख्य नावे दुसऱ्या प्रभागात दुसऱ्या यादीत गेल्याने मतदार संभ्रमावस्थेत आहेत. तसेच बोगस मतदान करण्याची शक्यता आहे. त्यामुळे या विरोधात हरकत दाखल करणार आहे. महाविकास आघाडी संदर्भात लवकर चर्चा होईल. जागा वाटपाचा फॉर्मुला त्यानंतर ठरवाला जाईल.
– चेतन नरोटे, शहराध्यक्ष काँग्रेस पार्टी.
प्राथमिक चर्चा झाल्यानंतर जागा वाटपावर निर्णय
आरक्षण सोडतीनंतर मतदार यादींचा घोळ झाला आहे. अशा अवस्थेत निवडणूक प्रक्रिया राबवणे चुकीचे आहे. सुप्रीम कोर्टाने देखील याविषयी ताशेरे ओढले आहेत. त्यामुळे निवडणूक प्रक्रिया लंबवली जाते का ? हे देखील पाहावे लागणार आहे. त्यानंतर खरे चित्र स्पष्ट होणार आहे. महाविकास आघाडीमध्ये स्टॅंडिंग उमेदवार आणि इलेक्टिव्ह मेरिट लक्षात घेतले जाईल. पक्षाचे प्राबल्य पाहून जागा वाटप केले जातील. शिवसेनेचे नेते चंद्रकांत खैरे यांच्याशी फोनवर चर्चा झाली आहे. लवकरच ते सोलापूर दौऱ्यावर येणार आहेत. प्राथमिक चर्चा झाल्यानंतर जागा वाटपावर निर्णय घेण्यात येईल.
– महेश गादेकर, शहराध्यक्ष राष्ट्रवादी काँग्रेस पार्टी शरद पवार गट
मतदार याद्यांचा घोळ कायम असल्याने महाविकास आघाडीतील नेत्यांनी महापालिका आयुक्त तथा निवडणूक निर्णय अधिकारी डॉ सचिन उंबासे यांच्याकडे आज हरकत दाखल करणार आहेत. एका प्रभागातील मतदार दुसऱ्या प्रभागात समाविष्ट केल्याने, मतदारांमध्ये संभ्रमावस्था कायम आहे. मतदार बदल झाल्याने उमेदवार आणि आजी-माजी नगरसेवक देखील चक्रावलेले आहेत. मतदार यादी घेऊन आजी माजी नगरसेवक तसेच इच्छुक उमेदवार प्रभागात मतदारांची चाचणी तपासणी करत आहेत. बोगस मतदान वाढेल असा अंदाज विरोधी पक्षाच्या माजी नगरसेवकांना येत असल्याने त्यांनी तात्काळ महापालिकेतील अधिकारी आणि निवडणूक कार्यालयात तक्रार दाखल करण्याच्या अनुषंगाने कामकाज सुरू केलेले आहे.
मतदार यादीत घोळ झाल्याने काँग्रेसने यावर हरकत घेतली आहे. तर दुसऱ्या छायाचित्रात काँग्रेसचे शहराध्यक्ष चेतन नरोटे राष्ट्रवादी काँग्रेस पार्टीचे शहराध्यक्ष महेश गादेकर चर्चा करताना
