पंढरपूर – पंढरपूर तालुक्यातील जिल्हा परिषदेच्या आठ पैकी जागांवर राष्ट्रवादी काँग्रेस पक्षाचे तर जागांवर परिचारकांच्या नेतृत्वाखालील भाजपाच्या उमेदवारांनी विजय मिळविला आहे. दुसरीकडे पंचायत समितीच्या निवडणूकी मध्ये देखील आमदार अभिजीत पाटील यांच्या नेतृत्वाखालील राष्ट्रवादी काँग्रेसने चांगलीच मुसंडी मारत परिचारकांच्या नेतृत्वाखालील तालुक्यातील पंचायत समितीच्या सत्तेला मोठा सुरुंग लावल्याचे निकाला नंतर स्पष्ट झाले आहे.
दरम्यान नगरपालिका तसेच महानगरपालिका निवडणूकीत ज्या प्रमाणे मोठ्या प्रमाणावर क्राँसव्होटिंग झालेले दिसून आले त्याच पध्दतीने तालुक्यातील जिल्हा परिषद आणि पंचायत समितीच्या निवडणूकी मध्ये अनेक गट आणि गणांमधून क्राँसव्होटिंग झाल्याचे निवडणूक निकाला नंतर समोर आले आहे. या झालेल्या क्राँसव्होटिंगचा फटका देखील अनेक मातब्बर उमेदवारांना बसल्याचे दिसून आले. या बरोबरच निवडणूकीच्या तोंडावर पक्षांतर करुन भाजपाशी घरोबा केलेल्या कल्याणराव काळे, समाधान काळे आणि गणेश पाटील यांना देखील मतदारांनी साफ नाकारल्याचे निवडणूक निकालावरुन दिसून आले. दुसरीकडे राष्ट्रवादी काँग्रेसचे आमदार अभिजीत पाटील आणि विठ्ठल कारखान्याचे माजी अध्यक्ष तथा तिर्थक्षेत्र विकास आघाडीचे प्रमुख नेते भगिरथ भालके यांनी अगदी प्रचार सुरु झाल्या नंतर केलेली युतीची घोषणा मतांचे विभाजन न झाल्यामुळे त्यांच्या दृष्टीने फायद्याची ठरल्याचे दिसून आले.
दरम्यान येथील तहसील कचेरी समोरील शासकीय गोदामा मध्ये सोमवारी (ता.९) दहा वाजता मतमोजणीला प्रारंभ झाला. प्रत्येकी एक गट आणि दोन गणांची अशा प्रकारे १६ टेबलवर आठ गट आणि सोळा गणांची मतमोजणी केली जात होती. यावेळी मतमोजणी नंतर आपआपल्या उमेदवारांच्या विजयश्रीची घोषणा झाल्यानंतर शासकीय गोडाऊन समोरील रेल्वे मैदानावर निकालाच्या प्रतिक्षेत असलेले त्यांचे कार्यकर्ते विजयी उमेदवाराला खांद्यावर घेऊन जल्लोष करीत होते. यावेळी गुलालाची मुक्तउधळण आणि फटाक्यांची आतिषबाजी देखील केली जात होती.मतमोजणी नंतर कुठेही अनुचित प्रकार घडू नये यासाठी तगडा पोलिस बंदोबस्त देखील ठेवण्यात आलेला होता. सकाळ पासूनच शासकीय गोडाऊन कडे जाणारी वाहतूक पुर्णपणे बंद करण्यात आलेली होती. त्यामुळे निकाला नंतर शहर आणि तालुक्यात कुठेही अनुचित घटना घडली नसल्याचे सांगण्यात आले.
दरम्यान मतमोजणी नंतर तालुक्याचे लक्ष लागून राहिलेल्या करकंब जिल्हा परिषद गटाच्या पहिल्या निकालाने भाजपाने आपले खाते उघडले. करकंब गटातून परिचारकांच्या नेतृत्वाखालील भाजपाच्या आदिनाथ देशमुखांनी विरोधी अभिजीत पाटील यांच्या नेतृत्वाखालील राष्ट्रवादी काँग्रेसचे उमेदवार बाळासाहेब देशमुख यांचा पराभव केला.
तालुक्यातील बऱ्याच वर्षापासून (कै.) यशवंतभाऊ पाटील त्यांचे पुत्र (कै.) राजुबापू पाटील आणि सध्या गणेश पाटील यांची एकहाती सत्ता राहिलेल्या भोसे गटातून धक्कादायक निकाल समोर आला आहे. कारण निवडणूकीच्या अगोदर विठ्ठल परिवाराला सोडचिठ्ठी देवून भाजपाशी घरोबा केलेल्या भोसे गावचे सरपंच गणेश पाटील यांच्या मातोश्री प्रफुल्लता पांडुरंग पाटील यांना पराभवाला समोरे जावे लागले. त्या ठिकाणी आमदार अभिजीत पाटील यांच्या नेतृत्वाखालील राष्ट्रवादी काँग्रेसच्या उमेदवार षण्मुखी भारत कोरके यांचा विजय झाला.
गोपाळपूर गटातून भाजपाच्या दुर्गा गोपाळ अंकुशराव या मोठ्या फरकाने विजयी झाल्या. शिवसेना एकनाथ शिंदे गटाच्या प्रियांका पराडे यांचा त्यांनी दारुण पराभव केला. वाखरी गटात सहकार शिरोमणी साखर कारखान्याचे अध्यक्ष कल्याणराव काळे यांचे बंधु समाधान काळे यांच्या पत्नी मोनिका काळे यांनी भाजपाच्या तिकीटावर निवडणूक लढविलेली होती. त्यांच्या विरुध्द राष्ट्रवादी काँग्रेस पार्टीच्या उमेदवार मयुरी बागल या निवडणूकीच्या रिंगणात होत्या. या निवडणूकीत मयुरी बागल यांनी मोनीका काळे यांचा पराभव करीत बाजी मारली. रोपळे आणि भाळवणी गटात देखील आमदार अभिजीत पाटील यांच्या नेतृत्वाखालील राष्ट्रवादी काँग्रेसच्या घड्याळाचा गजर ऐकावयास मिळाला.
——————–
चौकट : ( जिल्हा परिषद गट निहाय विजयी व पराभुत उमेदवार )
(करकंब गट ) – आदिनाथ देशमुख ( विजयी – भाजपा ). भोसे गट ) – षण्मुखी भारत कोरके ( विजयी- राष्ट्रवादी काँग्रेस पार्टी). ( वाखरी गट ) – मयुरी बागल ( विजयी, राष्ट्रवादी काँग्रेस ).( गोपाळपूर गट ) – दुर्गा गोपाळकृष्ण अंकुशराव ( विजयी – भाजपा ).( रोपळे गट ) – गितांजली हनुमंत साळुंखे ( विजयी, राष्ट्रवादी काँग्रेस).(भाळवणी गट) – सुप्रिया गायकवाड (विजयी, राष्ट्रवादी काँग्रेस).( लक्ष्मीटाकळी गट ) – नंदकुमार वाघमारे ( विजयी, भाजपा ) आणि ( कासेगाव गट ) —- मतमोजणी सुरु आहे —
—————–
पंचायत समिती गणनिहाय विजयी उमेदवार
( करकंब गण ) – राहुल पुरवत (विजयी, भाजपा ) आणि ( उंबरे गण )- शहाजी मुळे ( विजयी, राष्ट्रवादी काँग्रेस ).
( भोसे गण )- पुनम पवार ( विजयी, भाजपा ) आणि ( गुरसाळे गण )- महादेव पाटील (विजयी,राष्ट्रवादी काँग्रेस).
( गोपाळपूर गण )- रंजना आण्णा शिंदे (विजयी,भाजपा) आणि (पुळूज गण ) – ज्योती शिवाजी पांढरे ( विजयी, भाजपा ).
( वाखरी गण ) – निखील अरविंद गोसावी ( विजयी, भाजपा) आणि (पटवर्धनकुरोली गण)- प्रमिला झांबरे ( विजयी,राष्ट्रवादी काँग्रेस ).
( रोपळे गण ) – विजया विलास भोसले ( विजयी, राष्ट्रवादी काँग्रेस ) आणि ( सुस्ते गण )- सावली अतुल गायकवाड (विजयी,राष्ट्रवादी काँग्रेस शरदपवार पक्ष).
(भाळवणी गण )- विजय मोहन शिंदे ( विजयी,- भाजपा ) आणि (पळशी गण) – अक्काताई लोखंडे ( विजयी, राष्ट्रवादी काँग्रेस ).
( लक्ष्मीटाकळी गण ) – वंदना फाटे ( विजयी, भाजपा ) आणि (खर्डी गण ) – शुभम आगावणे ( विजयी, भाजपा )
( कासेगाव गण )- आणि ( सरकोली गण ) – मतमोजणी सुरु आहे.
—————-
फोटोओळी : पंढरपूर – जिल्हा परिषद आणि पंचायत समितीचे निकाल घोषित झाल्यानंतर विजयी उमेदवारांच्या कार्यकर्त्यांनी गुलालाची उधळण करुन मोठा जल्लोष केला.
