राजस्थानात भाजपला कौल मिळताना दिसत आहे. राज्यातील मतदारांनी विधानसभा निवडणुकीत दर ५ वर्षांनी सत्ताबदल करण्याची परंपरा कायम राखली आहे.
राजस्थानी मतदारांनी विधानसभा निवडणुकीत ट्रेंड कायम राखत सत्ताबदल घडवला आहे. सत्ताधारी काँग्रेसला गुडबाय म्हणत मतदारांनी कमळ फुलवलं आहे. १९९ पैकी ११० मतदारसंघांमध्ये भाजपकडे आघाडी आहे. त्यामुळे राज्यात भाजप सरकार येणार असल्याचं चित्र स्पष्ट होऊ लागलं आहे. राजस्थानात भाजपनं सात खासदारांना विधानसभा निवडणुकीच्या रिंगणात उतरवलं होतं. भाजपच्या या प्लानचं नेमकं काय होणार याकडे लक्ष लागलं होतं.
झोटवाडा विधानसभा मतदारसंघात काँग्रेसचे अभिषेक चौधरी आघाडीवर आहेत. मतमोजणीच्या सहा फेऱ्यांनंतर त्यांच्याकडे ७ हजार ९३३ मतांची आघाडी आहे. भाजपचे खासदार राजवर्धन राठोड दुसऱ्या क्रमांकावर आहेत. अलवर जिल्ह्यातील तिजारा मतदारसंघात महंत बालक नाथ आघाडीवर आहेत. ते भाजपचे उमेदवार असून लोकसभेत अलवरचं प्रतिनिधीत्व करतात. काँग्रेसचे उमेदवार इम्रान खान यांना त्यांनी १६ हजार ३५५ मतांनी मागे टाकलं आहे. चौथ्या टप्प्यातील मतमोजणी झाली असून अद्याप १६ टप्पे शिल्लक आहेत.
सांचोर विधानसभा मतदारसंघात भाजपनं खासदार देवजी पटेल यांना उमेदवारी दिली. मात्र त्यांना फारशी कमाल दाखवता आलेली नाही. विद्यमान आमदार आणि गेहलोत सरकारमधील मंत्री सुखराम विश्नोई ३ हजार ९८४ मतांनी पुढे आहेत. तर अपक्ष उमेदवार जीवाराम चौधरी दुसऱ्या स्थानावर आहेत. किशनगढ विधानसभा मतदारसंघात ४ टप्प्यातील मतमोजणी झाली आहे. अद्याप २० टप्पे शिल्लक आहेत. काँग्रेसच्या विकास चौधरींनी ५ हजार ३६२ मतांची आघाडी घेतली आहे. भाजपनं खासदार भगीरथ चौधरींवर विश्वास दाखवला. पण चौधरींपेक्षा अधिक मतं अपक्ष उमेदवार सुकेश टाक यांना मिळाली आहेत.
मंडावा विधानसभा मतदारसंघात काँग्रेसकडून विद्यमान आमदार रिटा चौधरींना संधी देण्यात आली. त्यांच्याविरुद्ध भाजपचे झुंझुनचे खासदार नरेंद्र कुमार मैदानात आहेत. सध्या कुमार ७ हजार ४६ मतांनी पिछाडीवर आहेत. मतमोजणीच्या ७ फेऱ्या झाल्या आहेत. अद्याप १५ फेऱ्या शिल्लक आहेत. सवाई माधोपूर मतदारसंघात भाजपचे किरोडी लाल २ हजार ९६ मतांनी पुढे आहेत. किरोडी लाल राज्यसभेचे खासदार आहेत. काँग्रेसचे दानिश अब्ररार सध्या दुसऱ्या क्रमाकांवर आहेत. या ठिकाणी मतमोजणीच्या ४ फेऱ्या पूर्ण झाल्या असून १५ फेऱ्या बाकी आहेत.
विद्याधर नगर मतदारसंघात भाजपनं खासदार दिया कुमारी यांना तिकिट दिलं आहे. सातव्या फेरीनंतर त्यांनी २० हजार ६२९ मतांची आघाडी घेतली आहे. काँग्रेसचे दिग्गज नेते सिताराम अग्रवाल यांना त्यांनी मागे टाकलं आहे. मतमोजणीच्या ७ फेऱ्या झाल्या असून १४ फेऱ्या अद्याप व्हायच्या आहेत. जयपूर शहर भाजपचा बालेकिल्ला मानला जातो. त्यामुळे दिया कुमारींचा विजय निश्चित मानला जात आहे.
