मोहोळ – शहराच्या बस स्थानकाजवळ नॅशनल हायवेच्या जागेमध्ये रात्री अचानकपणे गनिमी कावा करून छत्रपती संभाजी महाराजांच्या पूर्णाकृती पुतळ्याची उभारणी केली. या घटनेमुळे मोहोळ शहरांमध्ये अचानक पोलीस बंदोबस्त वाढवण्यात आला. शहरामध्ये काही काळ तणावपूर्ण वातावरण निर्माण झाले.
मोहोळ शहरामध्ये नॅशनल हायवे महामार्गालगत बस स्थानकाजवळ छत्रपती संभाजी महाराज प्रेमी आणि सकल मराठा समाजातील तरुणांनी रात्रीच्यावेळी नॅशनल हायवेच्या सुशोभीकरणाच्या राखीव जागेत कोणतीही पुर्व परवानगी न घेता छत्रपती संभाजी महाराज यांच्या पूर्णाकृती पुतळ्याची उभारणी केली. रविवारी सकाळी ही बाब प्रशासनाच्या लक्षात आल्यानंतर मोठा पोलीस बंदोबस्त वाढवण्यात आला. छत्रपती शंभू प्रेमींनी या ठिकाणी गर्दी केली. येथील पुतळा काढण्यात येऊ नये अन्यथा कायदा व सुव्यवस्था निर्माण होऊ शकते अशी भूमिका सर्वानी घेतली. त्यामुळे मोहोळ शहरात तणावपूर्ण वातावरण निर्माण झाले.पोलिस निरिक्षक बाजीराव पोवार यांचेकडून माहिती घेतली अणि
पोलीस उपाधीक्षक संकेत देवळेकर यांनी नॅशनल हायवे अधिकारी, मोहोळ तहसीलदार, तसेच नागरिकांना बोलावून बैठक घेऊन तोडगा काढण्याचा प्रयत्न केला. याबाबत पोलीस प्रशासनाने नॅशनल हायवे प्रशासनाला या जागे संदर्भात माहिती मागवली व या ठिकाणी पुतळा बसवण्यास परवानगीदिली आहे काय? याबाबत विचारणा केली आहे. याबाबतची माहिती आल्यानंतर प्रशासनाची पुढील कारवाई होणारआहे असे समजते. मात्र पुतळा परिसरात मोठा पोलिस बंदोबस्त वाढवण्यात आला आहे.
