मुंबई येथील राष्ट्रवादी काँग्रेसच्या कार्यालयात प्रदेशाध्यक्ष जयंत पाटील यांच्या उपस्थितीत पिंपरी चिंचवड शहरातील काही युवा कार्यकर्त्यांनी राष्ट्रवादीत प्रवेश केला.
राष्ट्रवादीत उभी फूट पडल्यानंतर शरद पवार आणि अजित पवार असे दोन गट तयार झाले. पक्षातील ऐतिहासिक बंडानंतर शरद पवार हे पुन्हा मैदानात उतरले असून राज्यभर त्यांनी सुरू केले आहेत. अजित पवार यांचा बालेकिल्ला म्हणून ओळखल्या जाणाऱ्या पिंपरी चिंचवडमध्येही पवार यांनी दौरे करण्यास सुरुवात केली आहे. त्यांच्या दौऱ्यानंतर शरद पवार गटात पिंपरी चिंचवडमधील काही नेत्यांनी प्रवेश केला असून त्यामुळे शहरात शरद पवार यांची ताकद वाढणार आहे.
मुंबई येथील राष्ट्रवादी कार्यालयात प्रदेशाध्यक्ष जयंत पाटील यांच्या उपस्थितीत पिंपरी चिंचवड येथील अनेक कार्यकर्त्यांनी राष्ट्रवादीत प्रवेश केला. शरद पवार यांचे एकेकाळी सहकारी राहिलेले अशोक पवार यांचे चिरंजीव उद्योजक राहुल पवार यांनी शरद पवारांच्या नेतृत्वातील राष्ट्रवादीत प्रवेश केला आहे. तसेच काळेवाडी येथील दोन वेळा नगरसेवक आणि महापालिकेतील माजी विरोधी पक्षनेते मच्छिंद्र तापकीर यांचे चिरंजीव सागर तापकीर, संतोष शिंदे यांनी पक्षप्रवेश केला आहे. संतोष शिंदे हे अखिल भारतीय नाट्य परिषदेच्या पिंपरी- चिंचवड शाखेचे खजिनदार आहेत.
शरद पवार यांनी नुकताच पिंपरी चिंचवडचा दौरा केला होता. त्यानंतर शरद पवार गटात इनकमिंग सुरू झालं आहे. तुषार कामठे हे नवीन शहराध्यक्ष झाल्यापासून त्यांनी पक्षवाढीसाठी आपली ताकद लावण्यास सुरुवात केली आहे. त्यामुळे पक्ष कार्यकर्त्यांत देखील मोठा उत्साह पाहायला मिळत आहे.
दरम्यान, मुंबईत झालेल्या पक्षप्रवेशावेळी पिंपरी- चिंचवडमधील युवक राष्ट्रवादी काँग्रेसचे शहराध्यक्ष इमरान शेख, राष्ट्रवादी विद्यार्थी काँग्रेसचे प्रदेशाध्यक्ष सुनील गव्हाणे आदी पदाधिकारी उपस्थित होते.
