भाजपने मराठ्यांना अंगावर घेऊ नये. याच मराठ्याने १०६ आमदार निवडून दिलेत. केंद्रात आणि राज्यात सत्ता आणण्यात मराठ्यांचा सिंहाचा वाटा आहे. त्यामुळे पंतप्रधानांनी उपमुख्यमंत्री देवेंद्र फडणवीस यांना समज द्यावी, अशी विनंती मराठा आरक्षणासाठी आग्रही असलेले मनोज जरांगे पाटील यांनी केली आहे. मराठा आरक्षणासाठी जरांगे पाटील यांच्या प्रमुख उपस्थितीत आज अंतरवाली सराटी येथे जाहीर सभा झाली. विराट संख्येने उपस्थित असलेल्या मराठा बांधवांना त्यांनी संबोधित केले.
मराठा समाजाला सरसकट कुणबी प्रमाणपत्र देऊन त्यांचा ओबीसीत समावेश करावा, अशी मराठा समाजाची प्रमुख मागणी आहे. त्यासाठी राज्य सरकारकडे केवळ १० दिवस उरलेत. या १० दिवसांत मराठा समाजाला आरक्षण द्या. तसेच मराठ्यांच्या पदरात आरक्षण टाकल्याशिवाय मागे हटणार नाही, असा इशाराच त्यांनी राज्य सरकारला दिला आहे. मी मराठा समाजाच्या पुढे जात नाही. आरक्षण मिळून दिल्याशिवाय मी एक इंचही मागे हटणार नाही. फक्त शांततेत आंदोलन करा. आरक्षण कसं मिळत नाही हे मराठा समाज बघून घेईल. जर २४ ऑक्टोबरच्या आत आरक्षण दिलं नाही तर मी टोकाचं उपोषण करेन. एक तर माझी अंत्ययात्रा निघेल किंवा मराठ्यांच्या आरक्षणाची विजययात्रा निघेल. पुढची दिशा २२ ऑक्टोबर रोजी तुम्हाला सांगितली जाईल. मराठा समाजाने सज्ज व्हावे, असेही जरांगे पाटील म्हणाले.
आरक्षण न दिल्यास पुढची जबाबदारी सरकारची!
ते पुढे म्हणाले की, मराठा समाज एक होत नाही असं बोलणाऱ्यांना या गर्दीने उत्तर दिले आहे. कोण म्हणतो मराठा एक होत नाही. यांना ते समाजावून सांगा आरक्षण घ्यायला आला की कशाला आला आहात. आपल्या मराठा समाज्याची मूळ मागणी आरक्षण आहे. नेमकं कोण आहे, जे मराठ्यांच्या लेकरांच्या भविष्याच्या मध्ये येत आहे? नेमक कोण आरक्षण देत नाही हे ऐकण्यासाठी कानाकोपऱ्यातून लोक आले आहेत. सरकारला विनंती आहे की, तुमच्या हातात ४० दिवसांपैकी १० दिवस हातात उरलेले आहेत. आज जो जनसागर उसळला आहे त्यांची ही मागणी आहे की, राहिलेल्या १० दिवसांत मराठा समाजाला आरक्षण द्यावे. जर दिलं नाही तर पुढची जबाबदारी सरकारची असेल.
पाच हजार पानांचा पुरावा मराठ्यांना आरक्षण मिळण्यासाठी पुरेसा!
मी सरकारला जाहीरपणे विनंती करतो की, मराठा समाजासाठी गठीत केलेल्या समितीचे काम बंद करा. पाच हजार पानांचा पुरावा मराठ्यांना आरक्षण मिळण्यासाठी पुरेसा आहे. तसेच मराठा आंदोलकांवरील गुन्हे अद्याप मागे घेतलेले नाहीत हेही यावेळी त्यांनी सांगितले.
काय आहेत जरांगे पाटलांच्या मागण्या
महाराष्ट्रातील समस्त मराठा समाजाला सरसकट कुणबी प्रमाणपत्र द्यावे, मराठा समाजाचा ओबीसीमध्ये समावेश करावा, कोपर्डीच्या ताईवर बलात्कार करणाऱ्या आरोपीला फाशीची शिक्षा द्यावी, मराठा समाजासाठी बलिदान देणाऱ्या ४५ बांधवांना सांगितलेला निधी व सरकारी नोकरी द्यावी, दर १० वर्षाला आरक्षण दिलेल्या ओबीसी बांधवाचा सर्व्हे करावा आणि प्रगत जाती बाहेर काढण्यात याव्यात, सारथी संस्थेमार्फत पीएचडी करणाऱ्या विद्यार्थ्यांना जास्तीचा निधी देवून त्यांचे सर्व प्रश्न मार्गी लावावेत, मराठा समाजाला ५० टक्क्यांच्या आत मराठा म्हणून वेगळा प्रवर्ग करुन आरक्षण दिलं तरीही चालेल पण टिकणारं आरक्षण हवं आहे.
