सोलापूर : विधान परिषद निवडणुकीसाठी गुरुवारी मतदान प्रक्रिया पार पडली. यावेळी भाजपच्या सर्व नगरसेवकांनी एकत्रितपणे मतदान करून पक्षाची एकजूट आणि शक्ती दाखवून दिली. सकाळपासूनच उत्तर सोलापूर तहसील कार्यालयातील मतदान केंद्रावर नगरसेवकांची उपस्थिती लक्षणीय होती.
निवडणूक निर्णय अधिकारी तथा जिल्हाधिकारी यांनी सकाळी मतदान केंद्राची पाहणी केली. मतदान केंद्र परिसरात कडेकोट पोलीस बंदोबस्त ठेवण्यात आला होता. वरिष्ठ पोलीस अधिकाऱ्यांनीही प्रत्यक्ष उपस्थित राहून परिस्थितीवर लक्ष ठेवले. भाजपच्या 95 पैकी 93 नगरसेवकांना नियोजनबद्ध पद्धतीने मतदानासाठी आणण्यात आले होते. भाजपच्या एका नगरसेवकाचे निधन झाले आहे तर नगरसेवक रुद्रेश बोरामणी हॆ परदेशात आहेत.तीन प्रभागांतील १२ नगरसेवकांचा एक गट तयार करून त्यांचे मतदान सुरळीत पार पडावे यासाठी स्वतंत्र समन्वयक नेमण्यात आले होते. पालकमंत्री जयकुमार गोरे यांच्या मार्गदर्शनाखाली आमदार देवेंद्र कोठे, शहराध्यक्ष रोहिणी तडवळकर, महापौर विनायक कोंड्याल , सभागृह नेते नरेंद्र काळे यांनी संपूर्ण प्रक्रियेवर बारकाईने लक्ष ठेवले.
मतदानासाठी येताना ओळखपत्र, मतदान कार्ड आणण्याबाबत तसेच मोबाईल व पेन मतदान केंद्रात न नेण्याच्या सूचना नगरसेवकांना देण्यात आल्या होत्या. सकाळी ९ वाजल्यापासून महिला आणि पुरुष नगरसेवकांनी एकत्रितपणे मतदानास सुरुवात केली. दुपारी १ वाजेपर्यंत भाजपच्या सर्व नगरसेवकांचे मतदान पूर्ण झाले.
दरम्यान, एमआयएमचे 9, शिवसेना 4 व काँग्रेसच्या 2 आणि राष्ट्रवादी काँग्रेस अजित पवार गट 1 या नगरसेवकांनी मतदानाचा हक्क बजावला. एकूण 111 पैकी 109 नगरसेवकांनी मतदान केले. भाजप कडील एक स्वीकृत नगरसेवक पद रिक्त आहे. दरम्यान, यावेळी शिवसेनेचे गटनेते अमोल शिंदे, काँग्रेसचे गटनेते चेतन नरोटे उपस्थित होते. मतदान केंद्राबाहेर दिवसभर राजकीय घडामोडींवर चर्चा रंगली होती.
मतदान प्रक्रिया पूर्ण झाल्यानंतर आमदार देवेंद्र कोठे आणि शहराध्यक्ष रोहिणी तडवळकर यांनी भाजपचे उमेदवार राजेंद्र राऊत मोठ्या मताधिक्याने विजयी होतील, असा विश्वास व्यक्त केला.
नगरसेविका शालन शिंदे यांनी
पोलीस बंदोबस्तात केले मतदान
मनसे पदाधिकारी युवराज सरवदे यांच्या खूनप्रकरणात न्यायालयीन कोठडीत असलेल्या भाजप नगरसेविका शालन शिंदे यांना सकाळी पोलीस बंदोबस्तात मतदान केंद्रावर आणण्यात आले. त्यांनी मतदानाचा हक्क बजावल्यानंतर पुन्हा त्यांना न्यायालयीन कोठडीत नेण्यात आले. या घटनेची दिवसभर राजकीय वर्तुळात चर्चा होती.
