ठाणे : वन विभागामध्ये नव्याने रूजू झालेल्या चेतना शिंदे यांची पहिलीच नियुक्ती कांदळवन कक्षाच्या भिवंडी परिक्षेत्रात झाली. महसूल विभागाकडून नव्याने हस्तांतरित झालेल्या खारफुटी क्षेत्र संभाळण्याची जबाबदारी चेतना शिंदे यांच्यावर होती. विशेष म्हणजे या विभागाकडे अत्यंत कमी मनुष्यबळ होते. परंतु करोना काळात निर्मनुष्य जंगलामध्ये सुरू असलेल्या अतिक्रमणे चेतना शिंदे यांनी हिंमतीने रोखली. उन्हाच्या झळा सोसत तासंतास घटनास्थळी ठाण मांडून जप्ती कारवाई पूर्ण करण्यावर भर दिला. त्यामुळेच खारफुटी रक्षणासाठी कांदळवन कक्षाकडून त्यांना सन्मानित करण्यात आले असून सध्या त्या कसारा येथे वन परिक्षेत्र अधिकारी म्हणून कार्यरत आहेत.
करोना काळातील पहिल्या लॉकडाऊनमध्ये सर्व व्यवहार ठप्प झाले होते. एप्रिल २०२० मध्ये एका दुपारी नव्याने वनविभाग वनपरिक्षेत्र अधिकारी म्हणून रुजू झालेल्या चेतना शिंदे वनविभागाच्या नर्सरीमध्ये हजर होत्या. त्याचवेळी वनविभागाच्या ‘हॅलो फॉरेस्ट’ या हेल्पलाइनवर भिवंडीतील खारबाव जवळच्या कांदळवनक्षेत्रात पोकलेनच्या सहाय्याने तळे खोदले जात असल्याची तक्रार आली. कांदळवन कक्षाच्या वन परिक्षेत्र अधिकारी चेतना शिंदे आपल्या वरिष्ठ अधिकारी गीता पवार यांच्यासह घटनास्थळी पोहचल्या. वनविभागाचे अधिकारी दाखल झाल्याचे पाहताच क्षणी पोकलेन चालक आणि त्याचे साथीदार तेथून पळून गेले. परंतु कांदळवन क्षेत्र नष्ट करण्याचे सुरू असलेले हे काम बंद करण्यासाठी तेथील पोकलेन जप्त करण्याची प्रक्रिया या महिला अधिकाऱ्यांनी सुरू केली. करोनाचा काळ असल्याने संपुर्ण परिसर निर्मनुष्य होता. मोबाइलवरून कार्यालयात संपर्क केल्यानंतर वनविभागाकडून अतिरिक्त मदत पाठवण्याची प्रक्रिया सुरू झाली. परंतु ही मदत येईपर्यंत दुपारी २ वाजल्यापासून सायंकाळी ७ पर्यंत भर उन्हात वनपरिक्षेत्र अधिकारी चेतना शिंदे आणि त्यांचे पथक घटनास्थळी ठाण मांडून बसले होते. पोकलेन घेऊन जाणार हे लक्षात येताच काही स्थानिकांनी विरोध करण्याचा प्रयत्न केला परंतु आपण योग्य कायदेशीर प्रक्रिया पार पाडत असल्याचे सांगत चेतना शिंदे यांनी कायद्याच्या शस्त्राने ही जप्तीची कारवाई पूर्ण केली.
एका महिन्याच्या अंतराने पुन्हा मे २०२० मध्ये कशेळी-काल्हेर येथील वनक्षेत्रात ट्रॅक्टरच्या सहाय्याने कांदळवन नष्ट होत असल्याची तक्रार मिळाली होती. घटनास्थळी पोहचून ट्रॅक्टर जप्त करण्याची कारवाई सुरू करताच स्थानिकांनी घटनास्थळी पोहचून कारवाई रोखण्याचा प्रयत्न सुरू केला. ट्रॅक्टर बाहेर काढतो, असे सांगत एका स्थानिक चालकाने ट्रॅक्टर चिखलात अडकवला. जमावाकडून विरोध आणि घोषणाबाजीही सुरू होती. परंतु आपण कायदेशीर मार्गाने ही कारवाई करत असून त्याला सहकार्य करा, अशी कठोर भूमिका चेतना शिंदे यांनी घेतली. त्यामुळे सायंकाळपर्यंत चाललेल्या या कारवाईमध्येही वनविभागाने अतिक्रमणाचे साहित्य जप्ती यशस्वीपणे पूर्ण केले.
या घटनानंतर कांदळवन कक्षाकडून महाराष्ट्र सुरक्षा दलाच्या पथकांचे संरक्षण घेत कारवाई करण्यास सुरूवात केली. त्यानंतर मुंब्रा येथे चाळमाफीयांनी कांदळवनामध्ये तयार केलेला दोन मीटर रस्ता चेतना शिंदे यांच्या पथकाने महसूल विभाग आणि पोलिसांच्या संयुक्त कारवाईत नष्ट केला, तर कोपरीमध्ये चाळमाफियांनी बांधलेली घरे कायदेशीर प्रक्रिया राबवून जमीनदोस्त केली. कारवाईच्या काळात जमाव अंगावर येत असला तरी आपण कायद्याचे शस्त्र वापरून त्यांना योग्य भाषेत उत्तर दिल्यामुळेच अनुचित प्रकार टाळल्याचे चेतना शिंदे सांगतात.
