सध्या ६५व्या महाराष्ट्र केसरी कुस्ती स्पर्धेचा थरार रंगला आहे. अनेक माजी विजेते आणि अव्वल दर्जाचे मल्ल या अटीतटीच्या स्पर्धेत उतरले आहे. ही स्पर्धा १० ते १४ जानेवारी दरम्यान होत आहे. या स्पर्धेत झालेल्या एका कुस्तीत जिवाभावाचे दोन मित्र आमनेसामने होते. ही कुस्ती ज्ञानेश्वर जामदाडे आणि सिकंदर शेख यांच्यात रंगली होती.
पुण्यातील कुस्ती महर्षी स्व. मामासाहेब मोहोळ क्रीडानगरी येथे सुरु असलेल्या महाराष्ट्र केसरी स्पर्धेत माऊली उर्फ ज्ञानेश्वर जामदाडेला पराभवाचा धक्का बसला आहे. आपलाच सराव सहकारी सिकंदर शेख याच्याकडून माऊलीला पराभव स्वीकारावा लागला आहे.
महाराष्ट्र केसरीच्या लालमातीच्या आखाड्यात दोन जवळचे मित्र एकमेकांना भिडले होते. माऊली जमदाडे आणि सिकंदर शेख यांची लाल मातीत झालेली लढत डोळ्यांचं पारणं फेडणारी ठरली. माऊली मूळचा अमरावतीचा आणि सिंकदर वाशीमचा आहे. पण हे दोघेही कुस्तीचे धडे कोल्हापूरच्या गंगावेश तालमीत एकत्र गिरवत आहेत. वस्ताद विश्वास हरगुले यांचे हे दोन्ही पठ्ठे, अर्थात गुरुबंधू आहेत. या दोन्ही जिवाभावाच्या मित्रांमधील ही लढत कुस्ती स्पर्धेत पाहणं, कुस्तीप्रेमींसाठी पर्वणी होती.
आखाड्यात पाय टाकला की मित्रत्व, शत्रुत्व आणि नाती, असं सारं काही विसरून समोरचा पैलवान हा प्रतिस्पर्धी आहे, याच विचाराने पैलवान एकमेकांशी स्पर्धा करतात. माऊली आणि सिकंदरच्या लढाईतही हेच जाणवलं. कुस्तीचा तडाखेबाजपणा पाहाता ही कुस्ती मित्रांमध्येच सुरु आहे, असं कोण म्हणूही शकलं नसतं. या दोन मित्रांची लढाई इतकी रंजक आणि तोडीस तोड होऊ शकेल, ही कल्पना केवळच कुस्तीतच होऊ शकते.
माती विभागातून अतिशय चुरशीच्या लढतीत सिकंदर शेखने माऊली जामदाडेला ९-४ असे पराभूत करताना स्पर्धेत आगेकूच केली. सुरुवातीलाच सिकंदरने माऊलीवर ताबा घेत २ गुण मिळविले. माऊली जामदाडेने पहिल्याच प्रयत्नात दुहेरी पट काढताना थेट ४ गुणांची कमाई केली. त्यानंतर सिकंदर शेखने शक्ती आणि युक्तीची सांगड घालत माऊलीचा ताबा घेत पुन्हा २ गुणांची कमाई केली.
त्यानंतर माऊली जामदाडेने दुहेरी पट काढण्याचा प्रयत्न केला, परंतु हा डाव उलटून टाकत सिकंदरने ४ गुणांची कमाई करत बाजी मारली. त्यानंतर दोघांनी देखील एकमेकांवर डाव टाकण्याचा प्रयत्न केला. पण यात माऊली जामदाडे याला वर्तुळाच्या बाहेर ढकलत सिकंदरने विजयश्री मिळविला.
