श्रीलंकेचे हे दोन्ही खेळाडू गंभीर जखमी झाले आणि त्यामुळे त्यांना थेट हॉस्पिटलमध्येच नेण्यात आले.

https://twitter.com/ArnavHot/status/1614582314775838721

तिसऱ्या सामन्यात श्रीलंकेला एकाचवेळी दोन धक्के बसले. कारण श्रीलंकेच्या दोन खेळाडूंची एकाचवेळी मैदानात जोरदार टक्कर झाली. ही मैदानातील टक्कर एवढी गंभीर होती की, यावेळी मैदानात स्ट्रेचर आणण्यात आले आणि या दोघांना मैदानाबाहेर नेण्यात आले.

ही गोष्ट घडली ती ४३ व्या षटकात. श्रीलंकेचा चमिका करुणारत्ने हा गोलंदाजी करत होता. या षटकाच्या पाचव्या चेंडूवर ही गोष्ट घडली. यावेळी विराट कोहली फलंदाजी करत होता. विराटने यावेळी स्क्वेअर लेगला फटका मारला. हा फटका पकडण्यासाठी बंदारा आणि वँडरसे हे दोघेही एकाच ठिकाणी धावले. या दोघांपैकी एक जण फटका अडवेल आणि दुसरा तो पकडून थ्रो करेल, असे वाटत होते. पण या दोघांंमध्ये योग्य समन्वय असल्याचे यावेळी पाहायला मिळाले नाही. कारण दोघांनाही मैदानात स्लाइड्स केल्या आणि हे दोघेही चेंडू पकण्यासाठी एकाच वेळी पुढे आले. यामध्ये चेंडू येण्यापूर्वी या दोघांची एकमेकांना टक्कर झाली. या दोघांचे पाय एकमेकांना लागले. या दोघांच्या पायांत चेंडू घुटमळला आणि तो सीमारेषेला लागला. पण या दोघांना या टक्करमध्ये जोरदार मार लागल्याचे पाहायला मिळाले.

हे दोघे एकमेकांवर आदळले आणि त्यानंतर ते मैदानात उभेच राहू शकले नाही. हा सर्व प्रकार पाहिल्यावर श्रीलंकेच्या डॉक्टरांनी मैदानात धाव घेतली. श्रीलंकेचे डॉक्टर यावेळी एका खेळाडूला बघत होते, पण दुसऱ्या खेळाडूचे काय होणार हा प्रश्न सर्वांनाच पडला होता. तेव्हा भारताचे डॉक्टर पुढे सरसावले आणि त्यांनी दुसऱ्या खेळाडूवर उपचार करायला सुरुवात केली. या दोन्ही खेळाडूंची अवस्था एवढी बिकट होती की ते पुन्हा खेळणार नाहीत, हे स्पष्ट झाले होते. त्यामुळे मैदानात यावेळी स्ट्रेचर मागवण्यात आले आणि या दोन्ही खेळाडूंना मैदाना बाहेर नेण्यात आले. या दोघांना त्यानंतर थेट हॉस्पिटलमध्ये नेण्यात आले. हॉस्पिटलमध्ये त्यांची वैद्यकीय चाचणी केली जाईल आणि त्यानंतर त्यांना नेमकं काय झालं हे समजू शकेल. या दोघांच्या प्रकृतीबाबतची अधिकृत माहिती अजूनही दोन्ही देशांच्या क्रिकेट मंडळाने दिलेली नाही.