नुकताच जिल्हाधिकारी कार्यालयात स्वातंत्र्य दिनी अर्धापूरच्या अमोल जयशिला उद्धवराव सरोदे यांना वर्ष 2021-2022 साठीचा जिल्हा युवा पुरस्कार प्रदान करण्यात आला.
अर्धापूर दि. 15 ऑगस्ट :- प्रतिनिधी
भारतीय स्वातंत्र्य दिनाच्या 77 व्या वर्धापन दिनानिमित्त आयोजित येथील जिल्हाधिकारी कार्यालयातील मुख्य शासकीय समारंभात जिल्हाधिकारी अभिजीत यांच्या हस्ते आज ध्वजारोहण करण्यात आले. स्वातंत्र्यसैनिक व विविध क्षेत्रातील मान्यवर यांच्या उपस्थितीत सकाळी 9.05 वाजता हर्षोल्हासात त्यांनी ध्वजवंदन केले. यावेळी जिल्हावासियांना त्यांनी शुभेच्छा दिल्या तसेच विविध क्षेत्रातील उल्लेखनिय कार्यासाठी अनेकांना पुरस्कार बहाल केले.
महाराष्ट्र शासनाच्या क्रीडा व युवक सेवा संचालनालय, पुणे अंतर्गत जिल्हा क्रीडा अधिकारी कार्यालय, नांदेड द्वारा जिल्हयात कार्यरत असलेल्या युवक, युवतीं व नोंदणीकृत संस्थानी केलेल्या समाजहिताच्या उल्लेखीत कार्याचा गौरव व्हावा आणि युवा विकासाचे कार्य करण्यासाठी त्यांना प्रोत्साहन मिळावे, यासाठी युवा पुरस्कार दिला जातो. अर्धापूरच्या अमोल जयशिला उद्धवराव सरोदे यांनी युवक विकासाच्या कार्यामध्ये उत्तम कामगिरी करून समाजातील असंघटित युवांना संघटीत करून तरुणांच्या व नागरिकांच्या सुप्त गुणांना संधी देऊन भरीव योगदान दिले. या सामाजिक कार्याची दखल घेऊन वर्ष 2021-2022 साठीचा जिल्हा युवा पुरस्कार जिल्हाधिकारी अभिजीत राऊत यांच्या हस्ते 10 हजार रुपये रोख, सन्मानचिन्ह, गौरवपत्र, शाल, श्रीफळ व पुष्पगुच्छ देऊन प्रदान करण्यात आला. यावेळी हा पुरस्कार अमोलने वडील उद्धवराव सरोदे व आई जयशिला सरोदे यांच्या समवेत स्वीकारला.
पुरस्कार हा अजून काम करण्याची प्रेरणा देतो आणि जबाबदारी वाढते. समाजाला आपलं काहीतरी देणं लागतं ह्या भूमिकेतून समाजाच्या सेवेसाठी मी तत्पर असेन. हा पुरस्कार मी माझ्या आईवडिलांना समर्पित करतो, अशी प्रतिक्रिया जिल्हा युवा पुरस्कार प्राप्त अमोल सरोदे यांनी आमच्या प्रतिनिधी बोलताना दिली.