मुंबई, १६ नोव्हेंबर (हिं.स.) :
महाराष्ट्र विधानसभा निवडणुकीत शरद पवार गटाच्या उमेदवारांसाठी नामसाधर्म्य आणि चिन्हांच्या गोंधळामुळे आव्हान अधिक कठीण होत आहे. ८७ जागा लढवणाऱ्या पवार गटाला यावेळी १६ मतदारसंघांमध्ये अपक्ष उमेदवारांच्या ‘ट्रम्पेट’ चिन्हामुळे अडचणींचा सामना करावा लागण्याची शक्यता आहे.
लोकसभा निवडणुकीत ‘पिपाणी’ आणि ‘तुतारी’ या चिन्हांमधील साधर्म्यामुळे शरद पवार गटाला मोठा फटका बसला होता. सातारा लोकसभा मतदारसंघात पिपाणी चिन्ह असलेल्या अपक्ष उमेदवाराने ३७,०६२ मते घेतली, त्यामुळे शरद पवार गटाचे उमेदवार शशिकांत शिंदे यांचा ३२,७७२ मतांनी पराभव झाला होता. अशा प्रकारचे नुकसान दिंडोरी, बारामती, अहमदनगर आणि बीडसारख्या मतदारसंघांमध्येही झाले होते.
विधानसभा निवडणुकीत १६ मतदारसंघांमध्ये पवार गटाच्या उमेदवारांच्या नावाशी साधर्म्य असलेल्या अपक्ष उमेदवारांना ‘ट्रम्पेट’ चिन्ह देण्यात आले आहे. उदाहरणार्थ, कर्जत जामखेडमध्ये रोहित पवार यांच्याविरुद्ध रोहित चंद्रकांत पवार, तासगाव-कवठे महांकाळमध्ये रोहित आबा पाटील यांच्याविरुद्ध रोहित आर. पाटील, तसेच फलटण, मुरबाड, दौंड आणि इतर मतदारसंघांतही अशीच स्थिती आहे.
शरद पवार गटाने ‘पिपाणी’ चिन्ह गोठवण्याची मागणी निवडणूक आयोगाकडे केली होती. मात्र, आयोगाने ही मागणी फेटाळून लावली. आयोगाने स्पष्ट केले की ईव्हीएमवर ‘ट्रम्पेट’ हे नाव दिसेल, त्यामुळे गोंधळ होणार नाही. मात्र, पवार गटाने आपल्या प्रचारात मतदारांना अधिक जागरूक करण्याचा निर्धार केला आहे.
आम्ही मतदारांना सांगतो की आमचं चिन्ह ‘तुतारी वाजवणारा माणूस’ आहे. लोकसभेत झालेला गोंधळ मतदारांच्या लक्षात आहे, त्यामुळे यावेळी तो होणार नाही, असं कर्जत जामखेडचे उमेदवार रोहित पवार यांनी म्हटलं आहे.
या चिन्हांमुळे काही मतदारसंघांत ५० हजारांपर्यंत मते अपक्ष उमेदवारांकडे गेली होती. त्यामुळे शरद पवार गटाच्या उमेदवारांसाठी यावेळी अधिक सावधगिरी आणि मतदारांशी स्पष्ट संवाद हा महत्त्वाचा ठरणार आहे.
या गोंधळामुळे पवार गटाला मोठा फटका बसण्याची शक्यता आहे. त्यामुळे त्यांना योग्य आणि स्पष्ट प्रचार अधिक प्रभावीपणे करावा लागेल, असे दिसते.
