तभा फ्लॅश न्यूज/सोलापूर : हिंदू संस्कृतीतील श्रावण महिना हा भक्तिभाव, व्रते-वैकल्ये व सण-उत्सवांचा असतो. यामध्ये नागपंचमी हा महिलांचा विशेष सण असतो. या सणात मेंदी, नेलपेंट आणि पारंपरिक शृंगार यांना विशेष महत्त्व असते. परंतु समाजात अजूनही एक असा वर्ग आहे, जो या आनंदापासून वंचित आहे त्या अनाथ, मानसिकदृष्ट्या अस्वस्थ किंवा दुर्लक्षित महिलांना नागपंचमीनिमित्त सौंदर्य साहित्याचे वाटप करण्यात आले.
या पार्श्वभूमीवर आस्था फाऊंडेशनच्यावतीने यंदा नागपंचमी एक सामाजिक बांधिलकीचा सण ठरला. एम्प्लॉयमेंट चौकातील ‘मंगलदृष्टी’ या संस्थेत राहणाऱ्या वृद्ध, मानसिकदृष्ट्या अस्वस्थ महिलांना नेलपेंट, मेंदी, टिकल्या, कंगवे, केसांचे क्लिप्स, सुगंधी साबण, हात रुमाल, मोत्याचे माळ, कानातले रिंगा व पॉंड्स पावडर यांचा सुंदर गिफ्ट बॉक्स देण्यात आला.
उमा (बिहार), सरस्वती आजी (आंध्रप्रदेश) आणि वंदना (सोलापूर) या महिलांनी या सौंदर्य साहित्याचा आनंद लुटताना डोळ्यांतून आनंदाश्रू ढाळले. उपस्थित महिलांबरोबर फेर धरून गाणी गायली, गोडधोड खाऊ वाटला गेला. काही महिलांना स्वयंसेविकांनी प्रेमाने मेंदी लावली, नखांवर नेलपेंट लावले आणि त्यांच्या चेहऱ्यावर उमललेले हास्य उपस्थित प्रत्येकाच्या मनात घर करून गेले.
सोलापूर मधील संस्कार आश्रम, वासल्य निराधार आश्रम, आधार निराधार आश्रम, मंगलदृष्टी निराधार आश्रम, कुष्ठरोग वसाहत, बेघर निवारा केंद्र, तसेच झोपडपट्ट्यांमधील निराधार महिलांसह हा उत्सव साजरा करण्यात करण्यात आला. तसेच अनाथ आश्रमातील बालिकांसाठीही सौंदर्य साहित्याचे वाटप करण्यात आले. मुलींनी नृत्य-सादरीकरण करत, गाणी म्हणत सणाचा आनंद द्विगुणित केला.
या प्रसंगी नीलिमा हिरेमठ, कांचन हिरेमठ, छाया गंगणे, संपदा जोशी, सविता जोशी, अनिता तालीकोटी, सुरेखा पाटील, विजयालक्ष्मी सिरसी, सविता उपाध्ये, शारदा जोशी, शैला दिडवणीय, स्वामी चराटे मॅडम आणि गवळी ताई, राधा वहिनी, प्रकाश डांगरे, पुष्कर पुकाळे, अविनाश मार्चल ,विजय छंचुरे आदी मान्यवर उपस्थित होते.
