स्वदेशी टाटा समूहचे शेअर्सवर गुंतवणूकदारांची बारीक नजर असते. अशा परिस्थितीत तुम्ही देखील शेअर बाजारात मोठा डाव खेळण्याचा विचार करत असाल तर टाटा समूहाच्या शेअरवर लक्ष ठेवू शकता. यापैकी टाटा मोटर्सवर गुंतवणूकदारांची करडी नजर साले कारण कंपनीने गेल्या सात तिमाहीनंतर म्हणजे तब्बल दोन वर्षानंतर नफा नोंदवला आहे. टाटा मोटर्सच्या शानदार तिमाही निकालानंतर ब्रोकरेज देखील शेअर्सवर बुलिश दिसत आहेत.
स्वदेशी कार निर्माता कंपनी टाटा मोटर्स लिमिटेडने चालू आर्थिक वर्ष २०२२-२३ च्या ऑक्टोबर-डिसेंबर तिसऱ्या तिमाहीत ३ हजार ०४३ कोटी रुपयांचा नफा कमावला असून चालू तिमाहीत वाहनांची चांगली विक्री झाल्याने कंपनीच्या नफ्यात वाढ झाल्याचे कंपनीने म्हटले. टाटा मोटर्सने सांगितले की, टाटा समूहाची ब्रिटीश युनिट जग्वार लँड रोव्हरचा (जेएलआर) महसुल गेल्या डिसेंबर तिमाहीत २८ टक्क्यांनी वाढून ६ अब्ज पौंड झाली. यामुळे ब्रोकरेज या स्टॉकबाबत खूप सकारात्मक आहेत. पुरवठ्यात सुधार आणि सेमीकंडक्टर चिप्सची वाढती मागणी, यामुळे कंपनीने सात तिमाहींनंतर प्रथमच फायदा नोंदवला.
शेअर बाजारातून तुम्ही देखील तगडी कमाईची संधी शोधात असाल तर टाटा मोटर्सचा शेअर तुम्हाला मदत करू शकतो. तिमाही निकालानंतर ब्रोकरेजने शेअर्सवर ‘Buy’ रेटिंग दिले आहे. ब्रोकरेज जेफरीजच्या मते, “चिपचा तुटवडा हळूहळू कमी होईल आणि येत्या काही दिवसांत जेएलआर फायद्यात राहील.” ब्रोकरेजने टाटा मोटर्सच्या शेअर्सवर रु. ५६५ च्या (पूर्वी रु. ५४० टार्गेट प्राईस) लक्ष्य किंमतीसह ‘बाय’ रेटिंग दिले.
कंपनीला गेले आर्थिक वर्ष २०२१-२२ च्या ऑक्टोबर-डिसेंबर तिमाहीला १ हजार ४५१ कोटी रुपयांचे नुकसान सहन करावे लागेल. तर यंदा स्टॉक एक्स्चेंजला दिलेल्या माहितीनुसार कंपनीने सांगितले की, या तिमाहीत तिचे एकूण उत्पन्नही ८८ हजार ४८९ कोटी रुपयांवर पोहोचले. मागील आर्थिक वर्षाच्या याच कालावधीत ७२ हजार २२९ कोटी रुपये, स्टँडअलोन आधारावर, या कालावधीत कंपनीचा निव्वळ नफा दुपटीने वाढून रु. ५०६ कोटी झाला आहे. तर वर्षभरापूर्वी याच तिमाहीत १७६ कोटी रुपये होते.
