पंढरपूर – वाखरी ते पंढरपूर पालखी मार्गाचे काम अतिशय संथ गतीने सुरू आहे. वाखरी गावालगतच्या पुलाच्या ठिकाणी धुळ आणि खड्डे यामुळे नागरिकांसाठी प्रवास करणे धोकादायक बनले आहे. याठिकाणचे काम वेळेत पूर्ण करण्यात येऊन, गावालगतच्या भागात गतिरोधक बसविण्यात यावे अशी मागणी ग्रामस्थांकडून होत आहे.
एमआयटी कॉलेज वाखरी ते पंढरपूर रस्त्याचे काम राष्ट्रीय रस्ते विकास प्राधिकरण यांच्यामार्फत करण्यात येत आहे. सदरचे काम हे अतिशय धिम्या गतीने सुरू आहे. इसबावी, वाखरी भागात काम पूर्ण होण्याआधीच रस्ता खराब झालेला आहे. त्यातच या मार्गावर वाखरी व इसबावी येथे असणाऱ्या पुलाचे काम गेल्या काही आठवड्यांपासून ठप्प आहे. यामुळे धुळ मोठ्या प्रमाणात निर्माण होत आहे. वाखरी येथे पूर्वीच्या रस्त्याचा वापर करण्यात येत असताना जुना पुल खराब झालेला आहे. गावालगतच्या पुलाजवळ रस्ता उखडल्याने धुळ निर्माण होत आहे. सदरचे काम पूर्ण कधी होणार अशी विचारणा स्थानिकांकडून होत आहे.
वाखरी गावालगत सर्व्हिस रोड तयार करण्यात आलेला नाही. काही ठिकाणी पूर्वीचा रस्ता हा सर्व्हिस रोड म्हणून वापरता येणार आहे. मात्र, त्याठिकाणची लेव्हल करून आवश्यक डागडुजी करणे आवश्यक आहे. मलपे ओढा, इसबावी येथील ओढ्याचे काम ठप्प आहे. याठिकाणहून वाहतुक मोठ्या प्रमाणात असते. रस्ता खराब असल्याने अनेकदा याठिकाणची वाहतुक विस्कळीत झालेली असते. तीच परिस्थिती सरगम चौक परिसरातील आहे.
——————-
काम गेळेत पूर्ण करण्याच्या ठेकेदाराला सूचना –
वाखरी ते पंढरपूर रस्त्याचे काम वेळेत पूर्ण व्हावे यासाठी संबंधित ठेकेदाराला सुचना दिल्या आहेत. खराब रस्त्याच्या ठिकाणी आवश्यक ती दुरूस्ती करण्यात येत आहे. कामगार हे सुट्टी तसेच इतर कारणांमुळे बाहेरगावी गेलेले होते. त्यामुळे काम थांबले होते. कामाला गती देण्याबाबत ठेकेदाराला सक्त सूचना देण्यात आल्या आहेत अशी माहिती प्रकल्प संचालक केशव घोडके यांनी दिली.
