सोलापूर – ऊस गाळप हंगाम सुरू होऊन एक महिना होत आला. ऊस कायदा १९६६ नुसार ऊस गाळप झाल्यापासून १४ दिवसाच्या आत ऊसबिले जमा करणे बंधनकारक असताना, एक महिना झाला तरीही साखर कारखान्यांनी ऊस बिले जमा केलेली नाहीत. याच पार्श्वभूमीवर स्वाभिमानी शेतकरी संघटनेने शुक्रवार
(दि. २८) नोव्हेंबर रोजी सकाळी अकरा वाजण्याच्या सुमारास सोलापूर विजापूर महामार्गावर व्हनमुर्गी फाटा (तेरामेंल) येथे रस्तारोको आंदोलन शासनाचे व प्रशासनाचे लक्ष वेधले. यावेळी विविध घोषणा देत शेतकरी संघटनेने येत्या दोन दिवसात सकारात्मक निर्णय न घेतल्यास कर्नाटकमधील शेतकऱ्यांनी ज्याप्रमाणे उग्र आंदोलन केले. त्याप्रमाणे उग्र आंदोलन करू, वेळ पडल्यास कायदा हातात घेऊ असा निर्वाणीचा इशारा संघटनेचे जिल्हाध्यक्ष विजय रणदिवे यांनी यावेळी दिला.
दरम्यान, सोलापूर विजयपूर महामार्गावर शेतकऱ्यांनी रास्ता रोको आंदोलन केल्याने काही काळ सोलापूर विजापूर राष्ट्रीय महामार्गावरील वाहतूक विस्कळीत झाली होती. महामार्गावर वाहनाच्या लांबच लांब रांगा पहावयास मिळाल्या. प्रशासनाने तात्काळ आंदोलनकरते शेतकऱ्यांना महामार्ग वाहतुकीसाठी खुला करण्याची सूचना केल्यानंतर महामार्ग वाहतुकीसाठी सुरळीत करण्यात आला.
यावेळी आंदोलनात इकबाल मुजावर, मोहसीन पटेल,पप्पू पाटील, चाँदसो यादगिरे, बसवराज रामपुरे, कमलेश बामगोंडे, तुकाराम शेटसंदी, जावेद आवटी, सिकंदर मकानदार, वसंत पाटील, यासिन मकानदार, नरेंद्र पाटील, अब्दुलराजाक मकानदार, विजय साठे, भागवत बिराजदार, सचिन मस्के आदींसह स्वाभिमानी शेतकरी संघटनेचे पदाधिकारी कार्यकर्ते आणि शेतकरी उपस्थित होते.
शेतकऱ्यांना कायदा हातात घेण्यास भाग पाडू नये.
सोलापूर सोडून ईतर जिल्ह्यांमध्ये ऊसाला पहिली उचल म्हणून ३२०० ते ३६०० रुपये पर्यंत ऊस दर जाहीर केलेले आहेत. त्याचप्रमाणे सोलापूर जिल्ह्यामध्ये सुद्धा यावर्षी गाळप होणाऱ्या ऊसाला पहिली उचल ३४०० रुपये मिळावेत. या मागणीसाठी स्वाभिमानी शेतकरी संघटनेच्या वतीने शुक्रवार
(दि. २८) नोव्हेंबर रोजी सकाळच्या सुमारास सोलापूर विजापूर महामार्गावर व्हनमुर्गी फाटा (तेरामेंल) येथे रस्तारोको आंदोलन केले आहे. सर्वसागर कारखाने सत्ताधारी तसेच विरोधक लोकप्रतिनिधी यांचीच आहेत. त्यामुळे लोकप्रतिनिधी शेतकऱ्यांना ऊसाला दर देत नाहीत. शासन आणि प्रशासनाने यावर तात्काळ सकारात्मक भूमिका घ्यावी. अन्यथा शेतकऱ्यांना कायदा हातात घेण्यास भाग पाडू नये, ज्याप्रमाणे कर्नाटक राज्यामध्ये शेतकऱ्यांनी आंदोलन केले. त्याच पद्धतीने उग्र आंदोलन राज्यभर पेटवले जाईल.
– विजय रणदिवे, जिल्हाध्यक्ष स्वाभिमानी शेतकरी संघटना सोलापूर
शेतकरी मोठ्या आर्थिक अडचणीत
ऊस गाळप हंगाम सुरू झालेला आहे. तरी देखील कारखानदारांनी ऊस दर जाहीर केलेले नाहीत, रासायनिक खतांच्या किमती वाढल्या आहेत. महागाई वाढल्यामुळे ऊसाचा उत्पादन खर्च वाढला आहे. त्यातच सततच्या पावसामुळे ऊसाचे एकरी उत्पादन कमी झाले आहे. त्यामुळे शेतकरी आर्थिक अडचणीत आहेत. यावर शासनाने आणि प्रशासनाने सकारात्मक निर्णय घ्यावा.
– शंभुराजे भरले, ऊस उत्पादक शेतकरी
