बार्शी – येथील सुयश विद्यालयात क्रीडा महोत्सवाचा भव्य शुभारंभ आज शनिवारी उत्साहपूर्ण वातावरणात पार पडला. उद्घाटन समारंभासाठी बार्शी शहर पोलीस ठाण्याचे पोलीस निरीक्षक श्री. बालाजी कुकडे, श्री. सुरज ढमढेरे, पोलीस कॉन्स्टेबल बालाजी नागरगोजे तसेच संस्थेचे संस्थापक श्री. शिवदास नलवडे उपस्थित होते.
कार्यक्रमाची सुरुवात पाहुण्यांच्या स्वागतासाठी विद्यार्थ्यांनी सादर केलेल्या आकर्षक एरोबिक्स नृत्य प्रस्तुतीने झाली. त्यानंतर महाराष्ट्राचे आराध्य दैवत छत्रपती शिवाजी महाराज यांच्या प्रतिमेचे पूजन करुन महोत्सवाची औपचारिक सुरुवात करण्यात आली.
आपल्या मनोगतात बोलताना पोलीस निरीक्षक श्री. कुकडे यांनी सुयश विद्यालयात क्रीडा क्षेत्राला दिले जाणारे महत्त्व पाहून आपण भारावून गेल्याचे सांगितले. तसेच विद्यार्थ्यांना शुभेच्छा देत त्यांनी शकुंतला टर्फ ग्राउंडवर फुटबॉल स्पर्धेचे उद्घाटन करुन क्रीडा महोत्सवाचा प्रारंभ केला.
कार्यक्रमाचे प्रास्ताविक क्रीडाशिक्षक जाधव सरांनी केले, तर सूत्रसंचालन सौ. साखरे मॅडम यांनी कौशल्यपूर्णरीत्या पार पाडले. क्रीडा महोत्सव यशस्वी करण्यासाठी जाधव सर आणि सर्व सहशिक्षकांचे विशेष योगदान लाभले.
सुयश विद्यालयाच्या या उपक्रमामुळे विद्यार्थ्यांमध्ये क्रीडाभावना, संघभावना आणि शिस्तीचे महत्त्व अधिक दृढ झाल्याचे पाहुण्यांनी नमूद केले.
