बार्शी – जिजाऊ गुरुकुल येथे क्रांतीज्योती सावित्रीबाई फुले व राजमाता जिजाऊ माॅंसाहेब यांच्या जयंतीचे औचित्य साधून शैक्षणिक, बौद्धिक, सांस्कृतिक व सामाजिक अशा विविध उपक्रमांचे प्रभावी आयोजन करण्यात आले होते. या उपक्रमांमधून विद्यार्थ्यांच्या सर्वांगीण विकासावर भर देत महापुरुषांच्या विचारांचा जागर करण्यात आला.
या कार्यक्रमांतर्गत प्रश्नमंजुषा, वक्तृत्व स्पर्धा, वादविवाद स्पर्धा तसेच वार्षिक क्रीडा महोत्सव अशा विविध स्पर्धांचे आयोजन करण्यात आले होते. विद्यार्थ्यांनी या सर्व उपक्रमांमध्ये उत्स्फूर्त सहभाग नोंदवून आपली गुणवत्ता सिद्ध केली.
या सर्व उपक्रमांची सांगता राजमाता जिजाऊ माॅंसाहेब यांच्या जयंतीनिमित्त आयोजित विशेष मार्गदर्शन कार्यक्रमाने करण्यात आली. यावेळी विविध नामांकित वक्त्यांना निमंत्रित करण्यात आले होते.
श्री. देवा चव्हाण यांनी खेळीमेळीच्या वातावरणामध्ये “ऐकावं ते नवलच” या विषयावर विद्यार्थ्यांशी संवाद साधत जीवनातील सकारात्मक दृष्टिकोन, शिस्त आणि आत्मविश्वास यांचे महत्त्व पटवून दिले.
ऍड. विक्रम सावळे यांनी विद्यार्थ्यांना ‘भविष्यातील करिअरच्या विविध संधी’, स्पर्धा परीक्षा आणि योग्य नियोजनाबाबत सखोल मार्गदर्शन केले. तसेच सौ. कविता अंधारे व डॉ. तनुजा चिकणे यांनी राजमाता जिजाऊ माॅंसाहेब व आधुनिक जिजा यांच्यातील संवादाच्या माध्यमातून आजच्या समाजातील ज्वलंत विषयांवर प्रभावी प्रकाश टाकला.
या कार्यक्रमप्रसंगी विविध स्पर्धांमध्ये प्राविण्य मिळवलेल्या विद्यार्थ्यांना मान्यवरांच्या हस्ते सन्मानचिन्ह व प्रमाणपत्र देऊन गौरविण्यात आले. या कार्यक्रमाचे आणखी एक वैशिष्ट्य म्हणजे जिजाऊ गुरुकुलच्या शैक्षणिक व सांस्कृतिक उपक्रमांचे दर्शन घडविणाऱ्या वार्षिक कॅलेंडरचे प्रकाशन मान्यवरांच्या हस्ते करण्यात आले.
या थोर मातांच्या जयंतीनिमित्त रक्तदान शिबिराचेही आयोजन करण्यात आले होते. या शिबिराला पालकांनी उत्स्फूर्त प्रतिसाद देत एकूण ५५ रक्त पिशव्या संकलित करण्यात आल्या.
थोर महापुरुषांच्या जयंती केवळ औपचारिक न साजऱ्या करता सामाजिक बांधिलकी, प्रेरणा आणि मूल्यशिक्षणाच्या माध्यमातून कशा प्रकारे साजऱ्या कराव्यात याचे उत्तम उदाहरण जिजाऊ गुरुकुलने घालून दिल्याचे मत अनेक मान्यवरांनी आपल्या भाषणातून व्यक्त केले.
कार्यक्रमास रोटरी क्लब बार्शीचे अध्यक्ष श्री. संजय हिंगमिरे, उद्योगपती चिंतामणी अण्णा, हनुमंत मोरे, पालक-शिक्षक व्यवस्थापन समितीचे अध्यक्ष येमेश कुऱ्हाडे, संस्थेचे संस्थापक अध्यक्ष संभाजी गाडगे, सचिव सौ. वर्षाताई गाडगे, प्रशासकीय अधिकारी किशोर कदम, डायरेक्टर संदेश कदम, फिजिकल कोच जे. बी. शिंदे यांच्यासह शिक्षक -शिक्षकेतर कर्मचारी, मोठ्या संख्येने पालक वर्ग उपस्थित होते. कार्यक्रमाचे सूत्रसंचालन सौ. मनीषा मोठे आणि सौ. वैष्णवी क्षीरसागर यांनी केले.
