सोलापूर – सोलापूर–पुणे रोडवरील नवीन पुलाच्या कामामुळे परिसरात सुरू असलेल्या खोदकामादरम्यान पुणे नाका येथील मडकी वस्ती परिसरात सिमेंट मिक्सर वाहन थेट मोठ्या खड्ड्यात पलटी झाले. ही घटना शनिवारी दुपारच्या सुमारास घडली असून, सुदैवाने या अपघातात कोणतीही जीवितहानी झाली नाही. मात्र वाहनाचे मोठे नुकसान झाले असून काही काळ वाहतूक विस्कळीत झाली होती.
पुलाच्या बांधकामासाठी रस्त्याच्या बाजूला खोल खड्डे खोदण्यात आले आहेत. त्याच ठिकाणी सिमेंट मिक्सर वाहन जात असताना अचानक तोल जाऊन वाहन खड्ड्यात उलटले. पलटी झालेल्या वाहनाची चाके पूर्णपणे वरच्या बाजूला झाली होती, त्यामुळे परिसरात एकच खळबळ उडाली.
घटनेची माहिती मिळताच बांधकाम विभागाचे अधिकारी, पोलीस आणि आपत्कालीन यंत्रणा तातडीने घटनास्थळी दाखल झाल्या. वाहन बाहेर काढण्यासाठी तब्बल तीन मोठे क्रेन आणि जेसीबी मशीनच्या साहाय्याने युद्धपातळीवर प्रयत्न सुरू करण्यात आले. वाहन खड्ड्यात खोलवर अडकल्यामुळे ते बाहेर काढण्यास मोठ्या अडचणी येत होत्या.
या अपघातामुळे सोलापूर–पुणे रोडवरील वाहतूक काही काळ ठप्प झाली होती. वाहनांच्या लांबच लांब रांगा लागल्या होत्या. पोलिसांनी तात्पुरत्या स्वरूपात वाहतूक वळवून परिस्थिती नियंत्रणात आणली.
दरम्यान, पुलाच्या कामादरम्यान सुरक्षिततेच्या उपाययोजना अपुऱ्या असल्याचा आरोप स्थानिक नागरिकांकडून करण्यात येत आहे. रस्त्यालगत खोल खड्डे असूनही योग्य सूचना फलक, बॅरिकेड्स व प्रकाशव्यवस्था नसल्याने अशा प्रकारचे अपघात घडत असल्याची नाराजी नागरिकांनी व्यक्त केली. भविष्यात अशा घटना टाळण्यासाठी संबंधित यंत्रणांनी तातडीने सुरक्षा उपाय कडक करण्याची मागणी होत आहे.
