वैराग येथे ‘छत्रपती कृषी मार्गदर्शन केंद्रा’चे दिमाखात उद्घाटन

वैराग – शेतकऱ्यांचा उत्पादन खर्च कमी करून त्यांचे उत्पन्न दुप्पट करण्याच्या उद्देशाने, नमो आत्मनिर्भर कृषी व ग्राम विकास प्रबोधिनी संचलित ‘छत्रपती कृषी व ग्राम विकास मार्गदर्शन केंद्रा’चे भव्य उद्घाटन वैराग येथे संपन्न झाले. या केंद्राच्या माध्यमातून आधुनिक तंत्रज्ञान आणि नैसर्गिक शेतीचा संगम घडवून आणण्याचा संकल्प करण्यात आला आहे.

प्रमुख उपस्थितांची मांदियाळी

या कार्यक्रमाचे उद्घाटन बार्शी तालुका ग्रामीण पोलीस स्टेशनचे प्रभारी अधिकारी दिलीप ढेरे यांच्या हस्ते करण्यात आले. कार्यक्रमाच्या अध्यक्षस्थानी प्रबोधिनीचे संस्थापक आणि सेवानिवृत्त डी.वाय.एस.पी. नानासाहेब कदम होते. याप्रसंगी डॉ. कपिल कोरके, सतीश पाटील (सरपंच, इर्ले), ज्येष्ठ द्राक्ष उत्पादक शेतकरी शरद पवार, प्रताप डेंगळे, आनंद पवार,विजयकुमार डूरे पाटील द्राक्ष बागायतदार, प्रकाश देवकते 

 शरद पवार, लहू पवार,भूषण भूमकर,संकेत सुरवसे,नारायण फरतडे,रवी वायकुळे,दत्ता कापसे 

 प्रतीक कापसे आदी मान्यवर उपस्थित होते.

शेतकऱ्यांच्या समृद्धीसाठी विविध योजनांचा जागर

संस्थापक नानासाहेब कदम यांनी आपल्या मार्गदर्शनात केंद्र आणि राज्य सरकारच्या विविध योजनांची माहिती दिली. यामध्ये प्रामुख्याने खालील मुद्द्यांवर ऊहापोह करण्यात आला:

 * पी.एम. प्रणाम व आत्मनिर्भर कृषी योजना: रासायनिक खतांचा संतुलित वापर आणि नैसर्गिक शेतीला प्रोत्साहन.

 * ‘भारत विस्तार’ ए.आय. टूल: शेतीमध्ये कृत्रिम बुद्धिमत्तेचा (AI) वापर करून अचूक मार्गदर्शन मिळवणे.

 * शासकीय अभियान: मुख्यमंत्री समृद्ध पंचायतराज अभियान आणि ग्राम व कृषी परिवर्तन योजनेद्वारे गावांचा सर्वांगीण विकास.

 * पर्यावरण पूरक पाऊल: ३०० कोटी वृक्ष लागवड मिशन अंतर्गत वृक्षारोपणाची चळवळ राबवणे.

‘छत्रपती’ नैसर्गिक खत निर्मिती युनिट

शेतकऱ्यांचा खर्च कमी करण्यासाठी थेट ‘बांधावर खत निर्मिती’ ही संकल्पना मांडण्यात आली. ‘छत्रपती’ नैसर्गिक व रासायनिक खते आणि औषधे निर्मिती युनिटच्या माध्यमातून शेतकरी स्वतः दर्जेदार निविष्ठा तयार करू शकतील, ज्यामुळे त्यांचा निर्यातक्षम शेतमाल तयार होऊन उत्पन्न वाढण्यास मदत होईल.

बार्शी तालुक्यात ‘ड्रॅगन फ्रूट क्लस्टर’

यावेळी एक महत्त्वाची घोषणा करण्यात आली की, बार्शी तालुक्यात लवकरच ‘ड्रॅगन फ्रूट क्लस्टर’ योजना राबवण्यात येणार आहे. जवळगाव येथील मेकॅनिकल इंजिनिअर व संशोधक शेतकरी प्रताप डेंगळे यांनी ड्रॅगन फ्रूट शेतीमधील नवनवीन प्रयोगांबाबत शेतकऱ्यांना तांत्रिक मार्गदर्शन केले.

समारोप आणि तांत्रिक मार्गदर्शन

कार्यक्रमाचा समारोप आनंद पवार (प्रशिक्षक, छत्रपती आत्मनिर्भर केंद्र) यांनी केला. त्यांनी ओरीजनल रॉ मटेरियल, पिकांनुसार शेड्युल आणि नैसर्गिक खत निर्मितीच्या तांत्रिक बाबींवर सविस्तर प्रकाश टाकला. या केंद्रामुळे वैराग व परिसरातील शेतकऱ्यांना एकाच छताखाली आधुनिक शेतीचे धडे आणि साहित्य उपलब्ध होणार असल्याने शेतकरी वर्गातून समाधान व्यक्त होत आहे.