सोलापूर : त्यागमूर्ती माता रमाई आंबेडकर यांच्या जयंती निमित्ताने आज शनिवारी सोलापूर शहरात भव्य आणि दिमाखदार अशी मिरवणूक काढण्यात आली. विविध देखाव्यांद्वारे माता रमाई आणि विश्वभूषण डॉ. बाबासाहेब आंबेडकर यांच्या जीवन कार्याचे दर्शन घडविले. सुमारे 35 मंडळांनी या मिरवणुकीत सहभाग नोंदविला.
माता रमाई भीमराव आंबेडकर यांची 128 वी जयंती मोठ्या उत्साही वातावरणात सोलापूर शहरात साजरी करण्यात आली. विविध संस्था – संघटनांच्या वतीने अभिवादन करण्यात आले. दरम्यान, या जयंतीनिमित्ताने दिमाखदार अशी मिरवणूक काढण्यात आली. विविध संस्था व मंडळांच्या वतीने आकर्षक व प्रबोधनात्मक सजावट करून तथागत गौतम बुद्ध , डॉ. बाबासाहेब आंबेडकर व त्यागमूर्ती माता रमाई आंबेडकर यांच्या प्रतिमांची मिरवणूक काढण्यात आली.
पार्क स्टेडियम जवळील विश्वभूषण डॉ. बाबासाहेब आंबेडकर यांच्या पुतळ्यास मनोभावे अभिवादन करून या मिरवणुकीस जल्लोषात व उत्साही वातावरणात आज दुपारी 4 .30 वाजता प्रारंभ झाला. गुलालाची मुक्त उधळण करण्यात आली. प्रत्येक मंडळाने माता रमाई यांच्या त्याग, संघर्ष आणि योगदानावर आधारित देखावे साकारले होते. त्यांच्या जीवनातील प्रेरणादायी प्रसंग प्रभावीपणे उभे करण्यात आले. या मिरवणुकीत डॉल्बीच्या तालावर तरुणाई थिरकली. मोठ्या संख्येने कार्यकर्ते सहभागी झाले होते. मिरवणूक बघण्यासाठी रस्त्याच्या दुतर्फा जनसागर लोटला होता. भारतरत्न डॉ. बाबासाहेब आंबेडकर मध्यवर्ती जयंती उत्सव समितीच्या पदाधिकाऱ्यांसह महिला व समाज बांधव मोठ्या संख्येने या मिरवणुकीत सहभागी झाले होते.
या मिरवणुकीत वैयक्तिक साम्राज्य, एस. जी. मित्र परिवार, ज्ञानसागर बहुउद्देशीय सामाजिक संस्था, रमाई युथ फाउंडेशन, भीम दर्शन सामाजिक संस्था, मैत्री साम्राज्य सामाजिक संस्था, भीमाई प्रतिष्ठान, बी. के. ग्रुप, विश्वरत्न प्रतिष्ठान, त्यागमूर्ती माता रमाई युवा मंच, भारतीय भीम दल तरुण मंडळ आदी मंडळांचा उत्स्फूर्त सहभाग होता.
रमा हेच आपलं पंढरपूर यासह विविध आकर्षक देखाव्याद्वारे प्रबोधन
या मिरवणुकीत देखाव्यांद्वारे प्रबोधनात्मक संदेश देण्यात आला. माता रमाई आणि डॉ. बाबासाहेब यांच्या जीवन कार्याचे दर्शन घडविण्यात आले. यामध्ये
प्रबुद्ध ग्रुप : “रमा हेच आपलं पंढरपूर..!”, सम्राट युथ फाऊंडेशन : “सामाजिक परिवर्तन प्रतीक स्थळ – लखनऊ”, मैत्री ग्रुप : सजवलेल्या बग्गीत डॉ. बाबासाहेब आंबेडकर व माता रमाई यांच्या प्रतिकृती, माता रमाई प्रतिष्ठान : “इतिहास घडवणाऱ्या महामानवाच्या विचारांची ज्योत”, त्यागमूर्ती प्रतिष्ठान : “रमाई शिकली बाराखडी”
के. के. कंपनी : “डॉ. बाबासाहेब नावाच्या आकाशगंगेमधील पांढरा शुभ्र चंद्र म्हणजे रमाई” हे प्रबोधनात्मक देखावे लक्षवेधक होते. विविध 35 मंडळांनी या मिरवणुकीत सहभाग नोंदवला होता. यावेळी मोठ्या प्रमाणात पोलीस बंदोबस्त तैनात होता.
विविध संस्थांतर्फे मसाला भात वाटप
माता रमाई आंबेडकर यांच्या जयंतीनिमित्त १४ एप्रिल प्रतिष्ठान आणि गुरू महाराज प्रतिष्ठान यांच्या वतीने सम्राट चौक येथे मिरवणुकीत सहभागी भीम अनुयायांना मसाला भाताचे वाटप करण्यात आले.
असा होता मिरवणूक मार्ग
भारतरत्न डॉ. बाबासाहेब आंबेडकर चौक, सरस्वती चौक, मेकॅनिक चौक, छत्रपती शिवाजी महाराज चौक, सम्राट चौक मार्गे न्यू बुधवार पेठ येथील डॉ. बाबासाहेब आंबेडकर उद्यान येथे या मिरवणुकीचा रात्री 10 वाजता समारोप करण्यात आला. मिरवणूक पाहण्यासाठी रस्त्याच्या दुतर्फा मोठी गर्दी झाली होती.
