करकंब : श्री शिवांच्या सन्मानार्थ महाशिवरात्रि हा सण साजरा केला जातो.श्री शिव आणि श्री पार्वतीच्या लग्नाचे स्मरण व्हावे यासाठी हा सण साजरा करतात.हा सण म्हणजे जीवनात व जगामध्ये अंधार आणि अज्ञानावर मात करण्याचे स्मरण आहे.त्या अनुषंगानेच करकंब ता.पंढरपूर येथील माळी गल्लीतील महादेव मंदिरामध्ये महाशिवरात्री उत्सवाचे आयोजन माळी गल्लीतील समस्त शिवभक्तांनी केले होते.यावेळी मंदिराच्या गाभार्यातील दोन फूट उंचीच्या शिवलिंगास जलाने अभिषेक करण्यात आला.हे दोन फूट उंचीचे शिवलिंग २तास पाण्यात ठेवून जलाने अभिषेक करण्यात आला.
महाशिवरात्रीच्या निमित्ताने रात्रभर प्रथमतः भजन व नंतर शिवांच्या लीलांचे वर्णन करणारी,शिवभक्तीचे महत्त्व,शिवांच्या कथा व महिमा सांगणाऱ्या शिवलीलामृत ग्रंथाचे पारायण करण्यात आले. महाशिवरात्रीच्या दुसऱ्या दिवशी माळी गल्लीतील समस्त शिवभक्तांच्या वतीने महाप्रसादाचे आयोजन करण्यात आले होते.हा उत्सव यशस्वीपणे साजरा करण्यासाठी माळी गल्लीतील सर्व शिवभक्तांनी परिश्रम घेतले.
