सोलापूर : जय हनुमान तालीम संघ, सारोळे (ता. मोहोळ) यांच्यावतीने महाशिवरात्रीनिमित्त आयोजित भव्य जंगी कुस्ती स्पर्धेतील “श्री सिद्धेश्वर केसरी २०२६” किताब विजेते पै. श्रीनिवास पाथरूट तसेच आंतरराष्ट्रीय जलतरणपटू श्रावणी सूर्यवंशी यांचा गौरव करण्यात आला.
हजारो कुस्तीप्रेमींच्या उपस्थितीत पार पडलेल्या या स्पर्धेत “श्री सिद्धेश्वर केसरी २०२६” या मानाच्या किताबासाठी महाराष्ट्रातील नामांकित मल्लांमध्ये चुरशीच्या लढती रंगल्या.या विशेष कुस्ती मैदानाचे उद्घाटन आमदार राजू खरे व सोलापूरचे महापौर विनायक कोंड्याल यांच्या हस्ते करण्यात आले.याप्रसंगी जिल्हा परिषद सदस्य चरणराज चवरे,नगरसेवक बोज्जू अण्णा प्रधाने, नगर सेवक व्यकटेश कोंडी, नगर सेवक युवराज सरवदे, अक्षय अजिखाने, विश्वास शिंदे,अर्जुन जाधव,यशवंत पाथरूट, जनार्दन पाथरूट, शंकर अण्णा पाथरूट, हनुमंत अण्णा पाथरूट, कमलेश पाथरूट, आनंदकुमार शिंदे, समाधान पाथरूट, सिताराम पाथरूट, सूरज पाथरूट आदी उपस्थित होते.
यावेळी श्री सिद्धेश्वर केसरी २०२६ – ट्रिपल महाराष्ट्र चॅम्पियन” पै. श्रीनिवास पाथरूट आणि पै. अरमान पटेल यांच्यातील मानाचा अंतिम सामना खेळविण्यात आला. अत्यंत अटीतटीच्या आणि रोमहर्षक झालेल्या या लढतीत पै. श्रीनिवास पाथरूट यांनी उत्कृष्ट कौशल्याचे प्रदर्शन करत विजय मिळवला आणि “श्री सिद्धेश्वर केसरी २०२६” या किताबाचे मानकरी ठरले.आरंभ फाउंडेशनचे संस्थापक अध्यक्ष यशवंत पाथरूट यांच्यावतीने व विठ्ठल पाथरूट यांच्या स्मरणार्थ श्रीनिवास पाथरूट यांना चांदीची गदा सन्मानचिन्ह प्रदान करण्यात आले.
स्पर्धेत राज्यातील विविध भागांतील नामांकित तसेच उदयोन्मुख मल्लांनी सहभाग घेतला होता. प्रत्येक सामन्यात मल्लांनी ताकद, चिकाटी आणि तांत्रिक कौशल्याचे उत्कृष्ट दर्शन घडवले. याच कार्यक्रमात आंतरराष्ट्रीय जलतरणपटू कु. श्रावणी सूर्यवंशी यांचा विशेष सत्कार करण्यात आला.
