पंढरपूर – येथील स्वेरी कॉलेज ऑफ इंजिनिअरिंग मध्ये राष्ट्रीय सेवा योजना विभाग व महाविद्यालयाच्या माजी विद्यार्थी संघटनेच्या संयुक्त विद्यमाने छत्रपती शिवाजी महाराज यांच्या जयंतीनिमित्त भव्य रक्तदान शिबिराचे आयोजन करण्यात आले. या शिबिराला विद्यार्थी, प्राध्यापक व शिक्षकेतर कर्मचाऱ्यांचा उत्स्फूर्त प्रतिसाद लाभला.
शिबिराचे उदघाटन सोलापूरच्या वालचंद कला व शास्त्र महाविद्यालयाच्या इतिहास विभागाचे प्रा.डॉ चंद्रकांत चव्हाण यांच्या हस्ते झाले. या रक्तदान शिबिरात महाविद्यालयातील विद्यार्थी, शिक्षक व कर्मचारी वर्गाने समाजाप्रती असलेली आपली बांधिलकी सिद्ध करत उत्साहाने सहभाग नोंदविला. या शिबिरासाठी श्री स्वामी समर्थ ब्लड सेंटर, पंढरपूर, डॉ. हेगडेवार रक्त केंद्र, सोलापूर व श्री छत्रपती शिवाजी महाराज सर्वोपचार रुग्णालय व डॉ वैशंपायन स्मृती शासकीय वैद्यकीय महाविद्यालय सोलापूर अशा ३ रक्तपेढ्यांना आमंत्रित करण्यात आले होते.
विशेष म्हणजे या उपक्रमात विद्यार्थी, विद्यार्थिनी व प्राध्यापक वर्ग मिळून तब्बल ३३९ ऐच्छिक रक्तदात्यांनी रक्तदान करून राष्ट्रासाठी अमूल्य योगदान दिले. यावेळी मान्यवरांनी रक्तदाते व स्वयंसेवकांचे मनःपूर्वक कौतुक केले तसेच समाजहितासाठी रक्तदानासारख्या जीवनदायी उपक्रमांची गरज अधोरेखित केली. राष्ट्रीय सेवा योजनेच्या स्वयंसेवकांच्या नियोजनबद्ध कार्यपद्धतीमुळे हे ‘भव्य रक्तदान शिबिर’ अत्यंत शिस्तबद्ध व उत्साहपूर्ण वातावरणात पार पडले. या कार्यक्रमासाठी सौ. चव्हाण, संस्थेचे सचिव डॉ. सुरज रोंगे यांच्यासह इतर प्राध्यापक वर्ग उपस्थित होते.
संस्थेचे संस्थापक व कॉलेज ऑफ इंजिनिअरिंगचे प्राचार्य डॉ. बी. पी. रोंगे यांच्या नेतृत्वाखाली, कॅम्पस इन्चार्ज डॉ. एम.एम. पवार यांच्या सहकार्याने उपप्राचार्या डॉ. मिनाक्षी पवार यांच्या नेतृत्वाखाली हे शिबीर यशस्वी करण्यासाठी विद्यार्थी अधिष्ठाता डॉ. महेश मठपती, प्रा. अविनाश मोटे, राष्ट्रीय सेवा योजनेचे कार्यक्रम अधिकारी प्रा. अमोल चौंडे, माजी विद्यार्थी संघटनेचे उपाध्यक्ष दत्तात्रय घोडके, प्राध्यापक वर्ग तसेच सर्व स्वयंसेवकांनी परिश्रम घेतले.
