मंगळवेढा – अर्धनारी–माचनूर येथील बंधाऱ्याची पाहणी खासदार प्रणिती शिंदे यांनी आज केली. येथील शेतकरी व ग्रामस्थांनी सातत्याने मांडलेल्या मागणीची दखल घेत खासदार प्रणिती शिंदे यांच्या पाठपुराव्यामुळे उजनी पाटबंधारा विभागामार्फत या बंधाऱ्यावर तब्बल १०० दरवाजे बसविण्यात आले. या कामामुळे परिसरातील पाणी साठवण क्षमतेत लक्षणीय वाढ होऊन शेकडो शेतकऱ्यांना त्याचा थेट लाभ मिळत आहे.
बंधाऱ्यावर दरवाजे बसविल्यानंतर नदीपात्रात पुरेसा पाणीसाठा निर्माण होत असून अर्धनारी व माचनूर परिसरातील शेती सिंचनासाठी मोठा दिलासा मिळाला आहे. त्यामुळे खरीप व रब्बी हंगामातील पिकांसाठी पाण्याची उपलब्धता वाढली असून शेतकऱ्यांचे उत्पादन वाढण्यास मदत होत आहे.
आज झालेल्या पाहणीदरम्यान खासदार प्रणिती शिंदे यांनी बंधाऱ्याच्या कामकाजाची प्रत्यक्ष माहिती घेतली. यावेळी बंधाऱ्यावर विधीवत पूजन करण्यात आले. या प्रसंगी अर्धनारी गावचे सरपंच पवार, माचनूरचे माजी सरपंच बबन सरवळे यांच्यासह मोठ्या संख्येने शेतकरी व ग्रामस्थ उपस्थित होते.
यावेळी बोलताना खासदार प्रणिती शिंदे म्हणाल्या, “शेतकऱ्यांच्या पाण्याचा प्रश्न कायमस्वरूपी सोडवणे हे माझे प्राधान्य आहे. बंधाऱ्याचे दरवाजे बसविल्यामुळे पाणी अडवून ठेवता येत असून त्याचा फायदा शेतीसह भूजल पातळी वाढीसाठीही होणार आहे.”
या कामाबद्दल ग्रामस्थांनी खासदार प्रणिती शिंदे यांचे आभार मानले. तसेच भविष्यातही अशाच पायाभूत व शेतकरीहिताच्या विकासकामांसाठी सहकार्य करण्याची अपेक्षा व्यक्त केली.
यावेळी तालुका काँग्रेसचे अध्यक्ष प्रशांत साळे, प्रदेश सचिव रवीकरण कोळेकर, शहराध्यक्ष राहुल घुले यांच्यासह मनोज माळी, नाथा ऐवळे, रणजीत पाटील, आयेशा शेख, पंडित पाटील, सुनिता अवघडे, अभिमन्यू तात्या बेद्रे, अकबर मुलानी, राजू ठेंगील, संदीप पवार, शहाजी कांबळे व परिसरातील ग्रामस्थ मोठ्या संख्येने उपस्थित होते.
