मोडनिंब – येथील ग्रामदैवत श्री वेताळ देवस्थान यात्रेस बुधवारपासून (दि. २९) उत्साहात सुरुवात होणार असून, ही यात्रा तब्बल सहा दिवस चालणार आहे. यात्रेच्या पार्श्वभूमीवर गावात सोंगांच्या गाड्यांची जय्यत तयारी सुरू असून, अंतिम टप्प्यात आहे. यात्रोत्सवामुळे शहरात सर्वत्र उत्साहाचे वातावरण निर्माण झाले आहे.
मोडनिंब येथील सोंगांच्या गाड्यांमधून सामाजिक, ऐतिहासिक आणि मनोरंजनात्मक विषय आधुनिक, पौराणिक आणि डिजिटल स्वरूपात आकर्षक पद्धतीने सादर करण्यात येणार आहेत. विविध वेशभूषा आणि सोंगांमुळे यात्रेला विशेष रंगत चढणार आहे.यामध्ये पौराणिक, आधुनिक आणि डिजिटल सोंगांच्या गाड्या विशेष आकर्षण ठरणार आहेत. या देखाव्यांसाठी गावातील तरुणांनी दीड महिन्यापासून मेहनत घेत विविध सोंगे सजवली आहेत. सौदागर शिंदे यांच्या मार्गदर्शनाखाली साकारलेली ही देखावे यात्रेत उठून दिसणार असून, भाविकांसाठी मुख्य आकर्षण ठरणार आहेत. शहरातून निघणारी सोंगांच्या गाड्यांची मिरवणूक सुमारे ३ ते ४तास चालणार असून, ‘नरसिंह महाराजांचा देखावा’ आणि ‘डायनासोर’ सोंग विशेष चर्चेत राहणार आहेत. लहानांपासून ते मोठ्यांपर्यंत सर्वांचीच नजर या सोंगाच्या गाड्यांवर खिळून राहणार आहे. भगवान शंकर, नरसिंह महाराज, डायनासोर, कोंबडा आदी सोंगांनी सजलेल्या सुमारे २५ ट्रॅक्टर व बैलगाड्या गावाची प्रदक्षिणा होते.
श्री वेताळ देवस्थान ट्रस्ट व ग्रामस्थांच्या पुढाकारातून श्री वेताळ देवस्थान यात्रोत्सवात आयोजित या उपक्रमाचे सर्वत्र कौतुक होत आहे. विशेष म्हणजे, मोडनिंब येथे सोंगांच्या गाड्यांद्वारे पर्यावरणपूरक, पारंपारिक आणि स्वच्छतेचा संदेश दिला जात असून, ही संकल्पना इतर गावांसाठीही प्रेरणादायी ठरत आहे.
बालरूपी गणेश, १५ फुटी मोर, कोंबड्यांची झुंज, २४ फूट डायनासोर; ठरणार आकर्षण
बालरूपी गणेश, शंकर-पार्वती, बालरुपी कार्तिक आकर्षण ठरणार आहे. १५ फूट मोर, १३ फूट बाहुली, ‘भुताचा सापळा’, १५ फूट नरसिंह अवतार आणि २४ फूट डायनासोर यांसह विविध देखावे प्रेक्षकांचे लक्ष वेधून घेणार आहेत. अघोरी व कथकली सोंगांमुळे यात्रेला अधिकच रंगत येणार आहे.२० फूट कोंबड्यांची झुंज हेही विशेष आकर्षण ठरणार आहे.सुमारे ३० ट्रॅक्टर व बैलगाड्या गावाची प्रदक्षिणा करणार आहेत.
१०० स्वयंसेवक, २५० कलाकार; २५ ट्रॅक्टर-३० बैलगाड्यांतून भव्य यात्रेची जय्यत तयारी
श्री वेताळ देवस्थान यात्रेसाठी सुमारे १०० स्वयंसेवक आणि २०० ते २५० कलाकार सहभागी होणार असून, यासाठी दीड महिन्यापासून जय्यत तयारी सुरू असून आता अंतिम टप्प्यात आहे. सोंगांच्या गाड्यांसाठी सुमारे २५ ट्रॅक्टर आणि ३० बैलगाड्यांचा वापर करण्यात येणार असून, या सर्वांच्या समन्वयातून यात्रेचे आयोजन भव्य व दिमाखदार होणार आहे.
