सोलापूर : सोलापूर महापालिकेच्या मागील गेटजवळील स्टोअर रूम परिसरातून भंगार चोरीचा प्रकार उघडकीस आला असून हा प्रकार शिवसेना शिंदे गटाचे नगरसेवक अमोल शिंदे यांनी उघडकीस आणला. या प्रकारामुळे महापालिका परिसरात मोठी खळबळ उडाली. याप्रकरणी संबंधितांवर गुन्हा दाखल करण्याची मागणी करण्यात आली आहे.
महापालिका इमारतीच्या मागील बाजूस असलेल्या स्टोअर रूम मधून भंगार एका खाजगी गाडीमधून घेऊन जाताना नगरसेवक अमोल शिंदे यांनी आज दुपारी पकडला. त्यानी तात्काळ सभागृह नेते नरेंद्र काळे ,
महापालिका अतिरिक्त आयुक्त संदीप कारंजे, नगर अभियंता सारिका अकुलवार यांना फोन करून बोलावून घेतले. यावेळी नगरसेवक सत्यजित वाघमोडे, सात्विक बडवे, विनायक विटकर, किरण पवार यांच्यासह नगरसेवक, उपअभियंता अविनाश वाघमारे, अतिक्रमण प्रतिबंधक विभागाचे अधीक्षक जगन्नाथ बनसोडे उपस्थित होते. सर्वांनी स्टोअर मधील माल घेऊन जात असलेली छोटा हत्ती गाडीची पाहणी केली. या प्रकरणामुळे अतिरिक्त आयुक्त संदीप कारंजे, सभागृह नेते नरेंद्र काळे आणि नगरसेवक अमोल शिंदे चांगलेच संतापले. सदर बजार पोलीस ठाण्याचे पथक घटनास्थळी आले. यावेळी सभागृह नेते नरेंद्र काळे आणि नगरसेवक अमोल शिंदे यांनी योग्य चौकशी करून गुन्हा दाखल करण्याच्या सूचना दिल्या आहेत.
अतिक्रमण प्रतिबंधक विभागाकडून अतिक्रमित साहित्य जागेवरच निष्काशीत केले जाते. ते इथे आणले जात नाहीत. जप्त केलेले साहित्य आधार कार्ड पाहून दिले जाते. याप्रकरणी संबंधितांवर कायदेशीर कारवाई करावी अशी मागणी अतिक्रमण प्रतिबंधक विभागाचे अधीक्षक जगन्नाथ बनसोडे यांनी केली.
मिळालेल्या माहितीनुसार, महापालिकेच्या स्टोअर रूममध्ये विविध कारवायांमधून जप्त करण्यात आलेले भंगार साहित्य जमा केले जाते. सोमवारी सकाळी एका खासगी छोटा हत्ती वाहनातून हे भंगार भरून नेले जात असल्याची माहिती एका जागरूक नागरिकाने नगरसेवक अमोल शिंदे यांना दिली. त्यानंतर शिंदे घटनास्थळी पोहोचले असता वाहनात भंगार भरले जात असल्याचे दिसून आले. यावेळी संबंधित वाहन चालकासह भंगार भरत असलेले चार जण आणि काही कर्मचारी घटनास्थळावरून पसार झाल्याचे सांगण्यात आले. या प्रकरणात महापालिकेतील काही कर्मचाऱ्यांचा सहभाग असल्याचा संशय व्यक्त करण्यात येत आहे.
साहित्य चोरीला जाणे ही अत्यंत
लाजिरवाणी बाब : अमोल शिंदे
याबाबत बोलताना नगरसेवक अमोल शिंदे म्हणाले, महापालिकेच्या स्टोअरमधील भंगार खासगी वाहनातून बाहेर नेले जात होते. आम्ही घटनास्थळी पोहोचताच संबंधित चार जण आणि काही कर्मचारी पळून गेले. परवानगी नसताना अशा पद्धतीने महापालिकेचे साहित्य चोरीला जाणे ही अत्यंत लाजिरवाणी बाब आहे. संबंधितांवर तात्काळ गुन्हा दाखल करून कठोर कारवाई झाली पाहिजे.
सखोल चौकशी करून संबंधितांवर
गुन्हे दाखल करा : नरेंद्र काळे
दरम्यान, सभागृह नेते नरेंद्र काळे यांनीही या घटनेला गंभीर स्वरूपाचे प्रकरण असल्याचे सांगितले. स्टोअरमधील स्क्रॅप खासगी वाहनातून नेताना पकडण्यात आले. वाहन, चालक आणि स्क्रॅप जागेवर आढळले. काही कर्मचारी घटनास्थळावरून पळून गेले. या प्रकरणाची सखोल चौकशी करून संबंधित अधिकारी, कर्मचारी आणि आर्थिक व्यवहारात सहभागी असणाऱ्यांवर गुन्हे दाखल करावेत. कुणाचीही गय केली जाऊ नये, अशी मागणी त्यांनी केली.तसेच, स्टोअर परिसरातील सीसीटीव्ही फुटेज जप्त करून तपास करण्याच्या सूचना प्रशासनाला देण्यात आल्याचेही काळे यांनी सांगितले.
